Messi leh Busquets an khel dun dawn

Major League Soccer (MLS) club Inter Miami chuan Barcelona captain Sergio Busquets an lakluh thu an puang - Catalan club midfielder hian tun hma lama a khelhpui tawh Lionel Messi a khelhpui leh dawn tihna a ni.

Kum 34 mi Busquets hian May thla khan tun season tawp ruala Barcelona a chhuahsan tur thu hi a lo sawi chiang tawh, season 18 a chamchilh tawh hi La Liga nomawi nen a mangṭha.

Spanish midfielder bakah hian Paris Saint Germain tana contract hmang zo Messi chuan Inter Miami hi a zawm tur thu a lo sawi tawh bawk - Barcelona tana season 13 hmang dun tawh an nih avangin an inman nghal mai ang.

Barcelona tana an khelh dun hun chhung hian Champions League nomawi pathum, La Liga title pariat leh Copa del Rey nomawi paruk ngawt an chawi dun, tunah erawh chona hautak a ni dawn.

Inter Miami hi MLS Eastern Conference table-ah a hniam ber an ni mek a, match 18 an khelh aṭangin point 15 chauh an hmu - hmahruaitu Cincinnati chuan point 43 an nei tawh thung, an dinhmun a inthlau hle.

Busquets hian Saudi Arabian club aṭangin sawmna duhawm tak a dawng bawk a, mahse David Beckham-a club Inter Miami hi a thlang zawk, a kum ngaihtuahin ṭha takin a la khelh chhunzawm theih a rinawm.