Al-Hilal-in club record-in Neves lalut

Saudi Arabia club Al-Hilal chuan pound maktaduai 47-in Wolverhampton captain Ruben Neves an lalut a, club record a ni. Kum 26 mi Portugal midfielder hian kum khat dang contract a nei a, season ruk hnuah Molineux a chhuahsan.

Saudi Pro League-in sum hmangin Europe player langzar an thlem a, Neves hma hian Karim Benzema-a'n Real Madrid chhuahsanin Al-Ittihad a zawm. Kumin January thlaah Cristiano Ronaldo-a'n Al-Nassr a zawm tawh bawk.

Midfielder N'Golo Kante pawhin Chelsea chhuahsanin France tana khelhpui Benzema hnung zuiin Al-Ittihad a zawm leh bawk. Chelsea goalkeeper Edouard Mendy pawhin Al Ahli a zawm hnai a, Manchester City midfielder Bernardo Silva pawh Al Hilal in lak an tum.

Saudi Arabia club-te an tal nat avangin Europe player langsar an nghing a, UEFA president Aleksander Ceferin pawh a ṭawng chhuak hial. Mahse, dan ang thlapa Saudi Pro League club-te hi an chet avangin UEFA tan pawh an player ṭha chhuak lai thlir mai loh chu tih theih dang a tam lo.

Neves hi season hman zawh tak tawp lam Barcelona nen an sawi zawm a, mahse La Liga champion hian sum lamah harsatna an tawh avangin Portuguese midfielder lungawina khawp sum thehchhuah tur an nei lo.

Al Hilal-in Neves leina atana an sum hman zat hi kum 2020-a Wolves-in Liverpool-a Diogo Jota an hralhna pound maktaduai 41 aiin a tam a, Al Hilal tan record thar a ni bawk. Al Hilal hian kum 2021 khan pound maktaduai 15.4-in West Brom aṭangin Matheus Pereira an lalut a, tun ṭuma an sum hman hian a khum chiang hle.

Neves hian kum 2017 khan Porto aṭangin Wolves hi a zawm a, English club hi Championship aṭangin Premier League kaipui. Portuguese midfielder hi Premier League-ah pawh player pawimawh ni chhunzawmin season nga chhungin match 33 a khel tling ziah a, 2019–20 season-ah phei chuan match zawng zawngah a khel vek a ni.