Semifinal-ah Zverev a tla

Wimbledon inbuatsaihna zinga mi Halle Open-ah Alexander Zverev chu final thleng zo loin a tla. Inrinni zan semifinal inkhelah Zverev hian Alexander Bublik a ngam lo, darkar khat leh minute 24 an inkhelh hnuin 6-3, 7-5 in a chak lo a ni.

Semifinal inkhel dangah Andrey Rublev chuan Roberto Bautista Agut 6-3, 6-4 in a hneh ve thung a, nizan khan final khelh zui niin chanchin buatsaih laiin result erawh kan hre hman lo.

Kum 26 mi Zverev chuan, "Kan chak loh avangin hrehawm ka ti, chutihrualin season dang nena khaikhin chuan grass court-ah ka khel ṭha hle a, lawmna tur ka nei tho tihna a ni," tiin a sawi.

German tlangval Zverev hian tun season kal laiah nomawi a la chawi lo, inelna lian French Open khelh zawh takah khan semifinal thleng ve mah se Casper Ruud a hneh lo - tunah chuan July 3 aṭanga khelh tur Wimbledon a nghak tawh ang.