Demiral tan season a tawp

Juventus defender Merih Demiral chu a khup hliam vangin a rei lo berah thla ruk vel a chawlh a ngaih hmel a, tun season chhungin khelmualah a hmel kan hmu hman tawh dawn lo tihna a ni.

Kum 20 mi Demiral hi Juven captain Giorgio Chiellini hmun ruak luahin Pathianni zana AS Roma nen an inkhelh ṭumin bul a ṭan a, mahse hliam vangin minute 19-na lekah Matthijs de Ligt chuan a rawn thlak. Turkey international hian nikum nipui bazar lai khan Sassuolo aṭangin Juve hi a zawm ve chauh, a dinhmun sawhngheh theihna hun ṭha a neih lai takin hliam na tak a tuar - a hliam vang hian kumin nipui laia khelh tur European Championships lamah pawh a inlan theih a beiseiawm loh.

Turin club chuan an defender chungchangah thuchhuah siamin, "Roma kan hmachhawn ṭum khan Merih Demiral hian a khup vei lamah hliam a tuar a, a hliam hi endik a nih hnuah zai ngei a ngaih hmel," tiin an sawi. Italian champion Juve hi match 19 an khelh tawh chinah hmahruaitu an ni mek a, mahse pahnihna Inter Milan aia an sanna chu point hnih chauh a ni. Captain Chiellini chu hliam vangin an chan mek a, tunah defender dang a hliam leh hi chanchin ṭha lo a ni ang.