PVL Semifinal: Thutak Nunpuitu Team hmaah Tuichangral
Tualchhung volleyball inelna sang leh ngaihhlut hlawh ber Tata SK 712 Pro Volleyball League chuan a vawr tawp a thleng chho mek a, zanin aṭangin mipa semifinal khelh a ni dawn. Dar 8:00-ah Thutak Nunpuitu Team (TNT) leh Tuichangral te an inhmachhawn ang.
League round a zo tawh a, a thiam zual pali chauh an dam tawh - a chak lo zawkin puanthuah an tel nghal zel a ngai tawh dawn, chuvangin inkhel a hmuhnawm ngei ngei dawn, mual sir aṭanga ṭantu nei ṭha nih a pawimawh tel dawn a ni.
R. Dengṭhuama Indoor Stadium, Mualpuiah a hmuna en duh tan Rs 100 a ni a, mahni in lum aṭanga en duh tan LPS-in an live bawk. LPS YouTube lamah member tan en theih a ni bawk ang.
Valbuanga & TNT
Pro Volleyball League awm tawh ho thlirlet chuan, state pawn aṭanga player chah lut fuh leh nei ṭhate an dingchang deuh zel. Tun season erawh thawnthu danglam kan hmu mek - Mizoram pawn aṭanga rawn kalte pawhin an ngam loh Vanlalṭanchhana (Valbuanga) a awm.
TNT tan Valbuanga hi innghahna tham a ni a, player pawimawh bik niin match nga aṭangin point 118 a thawk chhuak tawh a, a team hi league round bikah a chakpui fai vek; zaninah pawh ani hi Tuichangral tana ven bik ngai tur a ni.
Tuichangral coach David Fanai chuan, "Valbuanga ven kan tum dawn, theihtawp kan chhuah ang," tiin Vanglaini a hrilh. Tuichangral hian an intawn hmasaka an ngam loh Mizo tlangval hi dan an tum dawn a, chumi tur chuan ruahmanna an siam fuh em, tih hriat a châkawm ta hle.
Tun season PVL an khelh dan thlir chuan TNT hi team inbuktawk ber an nih a rinawm, hei tak hi an chakna hnâr pawimawh a ni ṭhin. Valbuanga bakah hian Hunthar an hneh ṭuma Man of the Match Zosangzuala leh setter hmuhnawm Lalliankima te an la nei bawk.
Volleyball ngaina leh chawinawngtu zinga mi TNT hian PVL nomawi an la chawi ngai lo, kuminah hian a vawi khat nan champion an tum ruh hle. Team dangin an la tih theih ngai loh - Mizo hlanga khel chunga champion an nih theih chuan a hlu zual ngei ang.
Tuichangral beiseina
June 12, Thawhṭanni zan khan TNT leh Tuichangral te hi an lo intawng tawh, league round-ah hian Tuichangral lamin set la hmasa mah se set hnuhnung pathumah TNT an chungnung - Muanna Veng team hi zaninah rinkai zawk an ni dawn.
An intawn hmasakah chak mah se TNT assistant coach Lalzawmliana erawh a la ṭawng fimkhur hle, "Hnehsa a awm thei lo, kan vanneih ṭum a nih a, kan duh anga kan khel chhuak thei a nih erawh chuan kan chak theih kan beisei," tiin Vanglaini a hrilh.
TNT hian Tuichangral hi an huphurh lo, chutihrualin chesual ve thei tho an nihna an hrechiang bawk a, fimkhur takin an khel ang. An intawn hmasaka point 27 nei thei Vinod Khatkar hi chakpui tham a ni a, ani thlawp ṭhat hi an tum ang.
Tuichangral hian Khatkar-a thlawp tur hian captain Chhantea, Saidingpuia Sailo, Lalhmunmawia leh Vanlalthlamuanpuia Sailo te an nei a, anni ho hi an ṭangho fuh a nih phawt chuan TNT laka phuba la turin theihna an nei.
Tunah chuan hun kal tawh sawi a rem lo, semfinal-ah chuan point neih sa awm lo aṭangin bul an ṭan ve ve dawn. Tuichangral tan beisei awm lo a ni lo a, TNT tan pawh chak chiang sa a awm thei bik lo - thil chiang pakhat erawh volleyball hmuhnawm tak min chawpchhuahsak ngei ang.