Zaninah India leh Kuwait an intawng dawn ta

SAFF Championship-ah India leh Kuwait ten semifinal an lut ve ve tawh a, mahse, an la duhkhawp lo - group hmahruaitu ni chunga semifinal luh an duh ve ve a, zanin dar 7:30 hian team pahnih hian group A hmahruaitu nih an inchuh dawn.

India hian match hmasa berah Pakistan chu 4-0 in an sawp a, an match hnihnaah player inchawlh hahdamtir chungin Nepal chu 2-0 in an hneh bawk - Blue Tigers hian goal ruk khung tawhin, an lamah lut a la awm lo.

Kuwait thawnthu a danglam tam lo. An match hmasa berah Nepal chu 3-1 in an hneh a, match hnihnaah Pakistan chu 4-0 in an sawp ve bawk. Zanina an hmachhawn tur erawh tun hnaia hmasawn êm êm, inelna thlengtu India an ni a, chak tura an indah sa chuan an tisual ang.

India squad-ah hian Lallianzuala Chhangte chuan hmun pawimawh a chang chhunzawm zel a, Nepal laka chawlh hahdamtir forward hi zaninah chuan bul ṭan leh tawh tura beisei a ni.

Thawnthu hlui

FIFA ranking-ah chuan Kuwait hi 143-na daih an ni a, 101-na dinhmun luah mek India an phak lo hle. Mahse, ranking hi engkim hrilhfiahna a ni lo a, team pahnih intawn tawhna thlir phei chuan Kuwait hi dinhmun ṭha zawk an ni.

Dec 1978 kha India leh Kuwait intawn vawi khatna niin, Asian Games-ah 6-1 in Kuwait an chak a, November 2004 khan international friendly match-ah India hian 3-2 in an hneh mial a, hemi ṭuma goal khungtu zingah hian Jerry Zirsanga a tel.

Hetihlai hian Jerry hi kum 16 leh ni 311 mi niin, tun thlengin Blue Tigers tana goal khung thei naupang ber record a la chelh reng. November 2010 khan team pahnih hi an intawng leh a, 9-1 ngawtin Kuwait hian India an sawp.

Kum 2023 a her chhuak a, India tan phuba lakna hun ṭha a awm - India-in Kuwait an hneh chhunah Jerry-a'n goal a khung a, zaninah Lianzuala'n goal a khung ve thei ang em? A chhanna pek kan ni thuai dawn e.

Kuwait an ṭha

December 1998 khan Kuwait hian FIFA ranking-a an tawnsan ber tawngin 24-na an ni phak - tun hnaiah he team hi tlachhe deuhin lang mah se, Portuguese coach Rui Bento hoin an indinthar leh mek tawh a, age level hrang hranga Portugal team lo enkawl tawh coach hian Kuwait hi a siam ṭha leh tawh hle.

Kuwait hian kum 2023-ah match kua khel tawhin, vawi khat chiah tlawm an la nei a, an ngam loh pawh Asian champion Qatar niin, 2-0 in an hneh lo - a bak match kuaah erawh vawi riat chakin, vawi khat draw an nei.

Kumtira Arabian Gulf Cup inkhelah team ṭha Uzbekistan meuh an hneh a, Bahrain an inhnehtawkpui bawk - semifinal lut zo ta lo mah se March thla khan friendly match-ah Philippines (2-0) leh Tajikistan (2-1) an hneh zui a, SAFF khelh hmaa unofficial match-ah Zambia (3-0) leh Sudan (2-1) an hneh bawk.

Bento-a'n Kuwait team a din thar tih loh rual a ni lo a, India tan zaninah fimkhur a ṭul - a bikin forward Shabaib Al-Khaldi leh midfielder Ahmed Al-Dhefiri te ven bik chu thil finthlâk a ni ang.

Lianzuala a inringtawk

Tun hnaia Kuwait result kan sawi rualin India dinhmun hi sawi nep theih a ni bik lo. Blue Tigers hian an match hnuhnung pariatah goal an chhuah lo a, goal 14 zet an khung thung - mahni mualah tlawm loin match 12 zet an kal tawh bawk.

Blue Tigers chet ṭhat nana tha thawhhlawk zingah Lianzuala a tel phâk a, Mumbai City forward hian Kuwait lakah hnehna chan a beisei thu a sawi. Lianzuala chuan, "Kuwait khelh tawh dan ka en a, team ṭha tak chu an niin ka hria.

"Theihtawp chhuaha kan khelh leh a ngai dawn a, mahse, kan game plan anga kan khel chhuak thei a nih chuan kan hneh theih ka ring," tiin Vanglaini a hrilh a, a inringtawk.

India coach Igor Stimac-a'n 4-2-3-1 a rawn hmang leh tura ngaih a ni a, chuti a nih chuan tlarhmaah Sunil Chhetri mal tlatin, a hnungah Sahal Abdul Samad a ding ang a, Lianzuala leh Ashique Kuruniyan ten mual sir aṭangin an thlawp ang.

A hming Chhetri

India dinhmun sawi chuan Sunil Chhetri hming lam tel loh a harsa - Blue Tigers captain hian SAFF inelnaah goal li a khung leh der tawh a, kum 38 mi ni tawh mah se zaninah pawh ven bik ngai a ni leh ang.

Chhetri hian ram tan match 139-ah goal 91 a khung tawh a, international football-a goal khung tam lamah Lionel Messi (103), Iran legend Ali Daei (109) leh Cristiano Ronaldo (123) te chiah a tluk lo tawh - Messi leh Ronaldo an la inkhelh mek avangin um phak a harsain a rinawm a, Ali Daei a pel thei ang em, tih chu zawhna a ni mek.

India hian kuminah ringawt pawh ram pali inelna King's Cup (Thailand) leh ram pali inelna tho Merdeka Cup (Malaysia) an la hmabak a, Chhetri tan Ali Daei record khum theihna chance hi a la awm dawn niin a lang.

Kuwait laka hnehna chang turin India tan defender Sandesh Jhingan leh Anwar Ali pawh an pawimawh leh dawn a, Jeakson Singh leh Anirudh Thapa tan pawh an hna thawhṭhat a ṭul ang.