Bagnaia-a’n a dinhmun a sawhnghet

Francesco Bagnaia chuan Dutch Grand Prix-ah hnehna a chang a, bike intlansiakna sang MotoGP rider championship hmahruaitu a nihna chu a sawhnghet zel.

Pathianni zana tlan zawh tak Dutch GP-ah Bagnaia a chungnung a, tun season kal laia ṭum li a chakna ni tur hian Assen tlankawngah amah umphaktu an awm lo - a hnungah Marco Bezzecchi a thleng.

Pahnihna Bezzecchi hi Bagnaia ang bawka Italian rider - Ducati bike bawk khalh vetu a ni a, anni pannih hnungah hian Aleix Espargaro a thleng. Spanish rider erawh Aprilia Racing aiawhtu a ni.

Championship table lamah Bagnaia hian amah hnaih bretu Jorge Martin aiin point 35 zetin a hmu tam ta a, tunah chuan thlamuang takin nipui chawlh a hmang thei dawn.

Tun season chhungin intlansiak pariat an hmachhawn tawh a, hmabak 12 an la nei. July thla chhung an chawl dawn - August thlatir lamah inelna neih chhunzawm leh tur niin Silverstone tlankawngah British GP an tlan ang.

Kum 26 mi Bagnaia chuan, "Ka hnung lam aṭangin na takin min nawr reng a, intlansiak awlsam lo ve tak chu a ni chiang hle. Assen tlankawng hi nuam ka ti a, season dang ang bawkin tluang taka ka tlan thei kha ka lawm.

"A hmuna entu 105,000 chuang pungkhawm khan min ṭan êm êm tih kha hria, khangte khan intlansiak an ti nuam zual êm êm a ni. Chutihrualin calendar kan thlir chuan tunah hian a chanve kan la zo lo, chuvangin hmabak a la tam," a ti.

Rider dangte hma lam pana an tlan zel laiin Marc Marquez erawh a boruak a la fuh thei lo. Germany GP ang bawkin Dutch GP-ah pawh hian hliam vangin a inhnukdawk leh hnuhnawh a, a tan champion beisei ngam chi a ni tawh lo.

MotoGP vawi ruk champion tawh Marquez chuan, "Inrinnia sprint race kan tlan zawh khan ka ban hliam lai kha a rawn na. Pathianni zingah damdawi thiamte ka hmu a, anni chuan intlansiak thei dinhmuna ka din loh thu min hrilh," a ti.

Season thum chhung chu Marquez hian hliam vangin intlansiak a hmachhawn mumal thei ta lo, a team Repsol Honda nena an contract neih lai hi season thar daih a la ni a, hei pawh hi a hmang zo thei dawn em, tih a chiang ta lo.

Spanish rider hian a contract a hman zawh tur thu a sawi fo a, mahse khawthlang media lamah chuan a chhuak dawn nia sawi an awm fo thung. Tun season chawhnu lamah tal ṭha taka intlansiak ve leh chu a beisei theih hmasa a ni ang.