ISL club Odisha tana khel tur Buanga

AIFF Elite Academy aṭanga inzir chhuak Lalliansanga Renthlei (Buanga) chuan ISL club Odisha FC a zawm. Lunglei tlangval Buanga hian season liam ta khan I League club Rajasthan United tan season ṭha tak a hmang a, season tharah ISL club-ah chona thar a hmachhawn ang.

Buanga chuan, "ISL club-a khelh hi ka tum ber pakhat a ni a, khelhna hmun chan a harsa dawn tih pawh ka hria. Sudeva Delhi tana ka khelh lai khan loan hmanga ISL club zawm ka tum a, a hlawhtling ta lo. Tun ṭumah hun ṭha a rawn inher chhuak a, chona thar hmachhawn hi ka duh," tiin Vanglaini a hrilh.

Mizo tlangval Buanga hi defensive midfielder a ni a, a san ṭhat (feet ruk) bakah theihna a neih sân avangin hmabak pawh a nei êng hle. AIFF Elite Academy aṭanga a chhuah hnuin Buanga hian Chennaiyin a zawm a, reserve team tana a khelh hnuin I League club Indian Arrows, Sudeva Delhi leh Rajasthan United-ah te a intat hriam leh tawh a ni.