MiCA XCO race: Zanin thleng a inziah luh theih

Mizoram Cycling Association (MiCA) chuan June 30, Zirtawpni hian Muthi ramah cycling hmanga inelna Mizoram XCO 2023 a buatsaih dawn. Entry fee pe hi 40 vel an awm tawh a, zanin dar 11:59 thleng inziahluh theih a ni ang.

MiCA-in XCO race a vawi khat buatsaihna tur a ni a, kawng bumboh leh chhuk chho tak takah intlansiakna hi neih a ni ang. Inelna kalphung hi Cross-Country Olympic (XCO)a ni dawn a, category pathum Junior, Master leh Elite-ah ṭhen a ni. Junior-ah hian kum 17 chin an tel thei a, Master hi kum 35 chunglam tan niin Elite hi a duh apiang tan a ni thung. Cyclist tel turte hi category pakhatah chauh a tel theih a ni.

Mizoram Cycling Association hi December 1, 2015-ah din a niin Mizoram Societies Registration Act hnuaiah kum 2021 khan a in-register a. MiCA hi Mizoram State Sports Council hnuaia Member Association 33-na ni turin May 9, 2022 khan lakluh a ni. An hnuaiah hian Kolasib, Lunglei leh Champhai District Cycling Association te an awm mek a ni.