Mizorama chak ber an zawng dawn!

Mizoram Pachak leh Nuchak 2023 zawnna chu Mizoram Powerlifting Association leh Zonet ṭangkawp chuan an buatsaih dawn a, July 4, zan dar 7:00 hian Chanmari YMA Hall-ah a khuhhawnna neih a ni dawn - a hawnna neih zanah hian gas bur inchar reisiak hmangin inelna neih nghal a ni ang.

July 4-a ṭan tur inelna hian July 14 thleng a awh dawn a, mipa lam inelnaa chak ber hian Rs. 1,50,000 a dawng ang a, pahnihna pawhin Rs. 50,000 a la dawng pha dawn a ni - pachak zawnnaah hian lawmmanah ringawt Rs. 2,30,000 sem ral a ni dawn tihna a ni.

Pachak inelna hi a hautak dawn a, a hmuhnawm viau tura ngaih a ni - truck pawh kal (truck pull), motor hnuh kal, JCB ke nam leh, Motor ke hnungzawnga invawrhsiak, rit khai chunga intlansiak, lei aṭanga rit inchawi kan tam siak, lungtum inchawi siak, gas bur inchar rei siak, log lift, deadlift (motor chawi), dumbbell press leh bungraw thiar hmangtein inelna hi neih a ni ang.

Nuchak lam inelnaah hian pakhatnain Rs. 50,000 a dawng dawn a, pahnihnain Rs. 30,000 a hawn dawn - mipain chi hrang hrang 12 hmanga inelna an neih laiin, hmeichhia erawh inelna chi hrang pariat hmangin chak ber zawn a ni dawn thung.

Mizoram hmeichhe chak ber hre tur hian single arm dumbbell press (17.5), farmers walk (80 Kgs), atlas stone, tyre nam leh, squat for (1-rep Max) (equipped), trap bar deadlift (1-rep Max), plate hold (5kgs) leh babell clean & press for reps (30kgs) hmangin inelna neih a ni dawn a, a hmuhnawm loh ring suh.

June 28, Nilaini thleng hian inelnaa tel tur tan hming theh luh theih a ni a, registration form hi Zonet Office, Zarkawt, Monster Gym, Bawngkawn leh Reborn Gym, Khatlaah te lain, heng hmunah vek hian thehluh tur a ni - a duh tan www.zonet.in aṭangin a download theih bawk.

Mizoram Pachak leh Nuchak 2023 organising committee secretary Vanlalzarzova chuan, "Kan phur tawh viau mai, inelna hmachhawn turte pawh an inbuatsaih nasain an phur tawh hlawm hle a ni," tiin Vanglaini a hrilh a, Mizo mipuite tan ennawm hmuhnawm tak an phochhuah tur thu a sawi.

Kum 2006 khan Mizoram Powerlifting Association din a ni a, hemi hnuah hian Mizoram Pachak zawnna hi vawi hnih buatsaih a ni tawh - kum 2011 leh 2019 khan neih niin, Lunglei Venglai tlangval P. Lalchamliana chu Mizoram pachak berah thlan a ni ve ve.

Chama chuan, "Kan kumte a lo tam ve ta deuh a, eizawnnain a lo zir tawh lo bawk nen, ka tel thei dawn ta lo a ni," tiin Vanglaini a hrilh a, inelna buatsaih a ni tur chu phurawm a tih thu a sawi bawk.

Mizoram Pachak 2023 main sponsor hi Mizoram State Sports Council (MSSC), Govt. of Mizoram a ni a, Mizo mipuiin inelna hi an ngaihlu viau tura beisei a ni.