Grass-ah Alcaraz a champion

Wimbledon inbuat-saihna zinga a langsar bera chhal ngam Queen’s Club Championship-ah Carlos Alcaraz a champion. Spanish star hian nomawi a chawi a ni satliah lo, world number 1 dinhmun a luah leh ta chiah bawk.

Pathianni zan final hmuhnawm takah Alcaraz hian a khingpui Alex de Minaur chu 6-4, 6-4 in a hneh a, tun kar chhunga inkhel loa awm Novak Djokovic chu world ranking lamah a tlanpel theih phah dawn a ni.

Kum 20 mi Alcaraz hian grass court tournament hi vawi thum chauh a la khel, a tan chuan Queen’s Club Championship title lak hi thil lawmawm leh lian tak a tling. Wimbledon an khelh hunah seeded pakhatna a nih theih phah dawn a, lawmna tur zel a ni ang.

Grand Slam vawi khat champion tawh Alcaraz chuan, "He hmunah hian player ropui leh ṭha tak takin inelna an lo hmachhawn tawh ṭhin a, nomawi pawh an lo chawi tawh ṭhin, chung mite hnung zuia ka champion ve thei hi ka lawm.

"Tuna ka hnehna chan hian Wimbledon atan inrintawkna nasa tak min siamsak ngei ang. Tournament tir lamah khan ka khel ṭha tawk lo a, a hnu lamah erawh insiamrem chhoin, mipui thlawpna ka dawng bawk a, chu chu ka hlawhtlin chhan a ni," a ti.

Spain ramah chuan clay court-ah an inkhel ṭhin a, hei hi Alcaraz inkhelh thiamna hmun a ni - hard court pawh a hmang thiam, season hmasa khan US Open nomawi a chawi hial, grass bikah chuan match 11 chiah a la khel hial a ni.

Grass court inelna lian ber Wimbledon hi July 3 aṭangin All England Club, London-ah an khel ṭan ang.