Player kan lak ngei a ngai - Arteta

Arsenal manager Mikel Arteta chuan Premier League champion an duh tih a sawi a, hlawhtlinna chang tur erawh chuan an team tichak thei tur player an lakluh thar ngei a ngai tih a sawi bawk.

Season hmasa khan Arteta kaihhruai Gunners hian league nomawi an chawi teuh hle a, mahse a tawp dawnah an zuih. Champion si loa hmahruiatu ni rei thei ber record an siam, nomawi an chawi loh avangin awmzia erawh a nei lo.

Arteta chuan, "Ka hmuh dan chuan season thar lo awm tur hi Premier League harsat ber ṭum a ni dawn, a chhan chu England ram hian kum 22 chhung ka awm tawh a, season hmasa anga inelna boruak kha ka la hmu lo a, season thar chu a harsa zual dawn.

"Premier League champion ni tur chuan a ṭha ber nih a ngai, chuti tur chuan keini pawh kan inthuamṭhat ngei a ngai a ni," tiin a sawi a, thla 10 chhung Manchester City nen an inel hnua title an la lo chuan a la tihnat reng thu a sawi bawk.

Arsenal hian season tawp dawnah an defender rinrawl William Saliba chu hliam vangin an chhawr thei lo a, nasa takin an tuar. Season tharah erawh France international hoin bul an ṭan thei dawn - tlarhnunga khel tur lak thar langsar erawh an nei rih lo.

Gunners manager Arteta chuan, "Kan player pawimawh pali vel an hliam kha chuan thil a harsa tawh a ni, khatiang hunah khan squad chhah a pawimawhzia chu a takin kan hre thar leh bawk.

"Kan elpuite kha khawvela team ṭha ber an ni a, anni elphak tur chuan tihsual neih kha a pawi bik hle. Kan thil tih leh sulhnu kha duhthusam ni lo mah se kan pawm a ngai," a ti.

Arsenal hian an midfielder rinrawl Granit Xhaka an chhuah dawn a, Chelsea aṭangin Kai Haverz an la dawn - tun kar chhungin contract an ziah fel hman a rinawm a, squad thuam chak nan player dang an la melh bawk.

Tun nipui bazar laia an player lak tum leh duh ber chu Declan Rice a ni. West Ham United lak tumin vawi hnih indawrna a kal tawh a, an la hnawlsak ve ve thung a, a vawi thum nan an dawr leh ang.

Rice hi awlsam taka lak theih a ni dawn lo - champion lai Manchester City an rawn inrawlh tlat. Player bakah club thutlukna a pawimawh dawn a, sum seng huai zawk lo tan lei a harsa dawn.