Second Division Playoff : Chanmari West FC an chak nuamsa

Second Division Playoff chu nimin khan khelh chhunzawm a ni a, Chanmari West FC chuan Friends United FC chu 9-2 in an sawp. Group B inkhel dangah Armed Veng FC-in EVFC Electric 2-1 in an hneh a, group match tawp ber thlengin inkhel boruak a nung dawn. Armed Veng hi vawi hnih chak tawh mah se Chanmari West tan kawng a inhawng. West Warriors hian Friends United an sawp avangin an match hnuhnung bera Armed Veng an hneh chuan second round an lut dawn.

Group C-ah Aizawl South FA leh FC Tlangnuam ten hnehna an chang ve ve a, vawi hnih ve ve an chak tawh. Team pahnih hi group match hnuhnung berah an inkhel dawn a, Aizawl South FA hian goal difference an neih ṭhat zawk avangin FC Tlangnuam tan chak ngei a ngai ang.

Vawiin match hmasa pahnihah group D team-te an inkhel dawn. Friends FC leh Orison FC te an match hmasa berah an chak ve ve a, group match hnuhnung berah an inkhel leh dawn bawk. Chutihrualin vawiin bikah chuan Friends FC leh Orison FC te khingpui tur Home Mission FC leh Grace Academy FC ten beisei tur an la nei tih hriat a ṭha.

Chawhma dar 11:30-ah Tuithiang FC leh RGSA FC te an inkhel dawn a, heta chak zawk hi group E aṭanga second round lut tur zawkah an ngaih theih ang. Tuithiang hian second division club neih ngei tumin player an inla khawm a, Republic Veng lamin MPL khel pha lo vengchhung player-te tuai hriam nan an hmang thung.