City tana ka khel thei hi ka lawm - Gundogan

Ilkay Gundogan chuan Manchester City tana a khelh avanga a lawm thu a sawi a, free transfer-a Barcelona a zawm tur thu a sawi bawk.

City-in Gundogan hi contract thar zawrh mah se Spanish champion Barcelona zawm a thlang. Germany international hian Catalan club tan kum hnih daih contract a ziak a, kum khat dang pawhsei theih dan a awm bawk.

Kum 32 mi Gundogan chuan, "Manchester hi ka chenna hmun a ni a, City chhungkuaah hian hmun pawimawh tak ka changin ka hria," tiin City a ngaihhlut thu a sawi.

Gundogan hian 2022-23 chhung khan match 51 a khel a, goal 11 khungin treble champion-na kawngah player pawimawh a ni. Match hnuhnung pasarih aṭangin Gundogan hian goal ruk a khung a, FA Cup final-ah Man United lakah goal hnih a khung.

Barcelona hian Gundogan an ziahluh hian a contract-ah buyout clause euro maktaduai 400 zet an ziak tel. Germany international midfielder chuan, "A hmasa berah Pep-a chungah ka lawm. A hnuaia khelh a, hun rei tak a hnuaia ka zir thei kha ka lawm a, ka theihnghilh tawh lo ang. Tun leh tun hmaa ka khelhpuite chungah ka lawm a, City ṭantute chungah ka lawm takzet bawk," tiin a sawi.

Gundogan hian City tan match 304 a khel a, goal 60 khungin nomawi 12 a chawi. Chung nomawite chu Premier League panga, Champions League pakhat, FA Cup pahnih leh Carabao Cup pali te an ni.

City director Txiki Begiristain chuan, "A finna, hruaitu ṭha nihna leh inpekna hi kan club tan a hlu a, midang fuihtu ṭha tak a ni. Man City chanchinah hmun pawimawh tak a chang a, tunah club chhuahsan mah se kan zinga mi ang chiahin a duh hun apiangah club-in kan lo lawm ṭhin ang," tiin a sawi.