Real Madrid-ah Luka Modric a khel zel dawn

Saudi Arabia lam aṭangin sum mawm tak nen rim ni mah se Luka Modric chuan Real Madrid tana rinawm chhunzawm zel a thlang a, Croatian midfielder hian Santiago Bernabeu-ah kum khat dang khelh chhunzawm turin contract thar a ziak.

Modric hian tun season tawp thleng bak contract a nei tawh lo a, mahse, kum khat dang khel turin contract thar a ziak leh ta a ni - kum 2024 nipui thleng Real-ah hian a cham ang.

Croatian legend Modric hian kum 2012 khan Tottenham Hotspur aṭangin Real Madrid a zawm a, match 488 khelhsak tawhin, La Liga nomawi pathum a chawipui a, Champions League-ah vawi nga ngawt a champion pui bawk.

World Cup 2018-ah khan Croatia chu World Cup final luhpuiin, Ballon d'Or a dawng a, Lionel Messi leh Cristiano Ronaldo tena an thunun football khawvela mimal chawimawina ngaihhlut hlawh ber a dawng thei hi a ropui danglam hle.

Modric chuan Real Madrid-a contract thar a ziak hi twitter lamah a pholang a, "Home Sweet Home," tiin a ziak. Real-a a cham thei chu mahni ina awm ang maia a inngaih thu a sawina a ni.

Real hian nipui transfer-ah Borussia Dortmund aṭangin Jude Bellingham an lalut tawh a, Espanyol aṭanga loan-a Joselu lalut bawkin, transfer lian dang sawi tur an la nei rih lo.

Mahse, Real hian an player neih ṭhat sa chelh lamah hun an hmang nasa a, Modric hma hian midfielder Toni Kroos, Dani Ceballos leh defender Nacho Fernandez te chu contract thar an ziahpui tawh bawk.