Al-Hilal-in Kalidou Koulibaly an la lut

Ruben Neves laluttu Al-Hilal-in Chelsea aṭangin Kalidou Koulibaly an lalut. Saudi club-in kum 32 mi Koulibaly an lakluhna zat hi pound maktaduai 20 (€23m) vela ngaih a ni.

Senegal defender Koulibaly hi kum thum vel liam taa Europe club ṭha en thlak rawn kha a ni a, nikum nipui khan pound maktaduai 33-in Napoli aṭangin London club hi a zawm. Season liam ta khan Koulibaly hian Chelsea a chet ṭhatpui lo a, sum tamna lam Saudi pan a thlang ta zawk.

Al Hilal-ah Koulibaly

Saudi Pro League-ah hian club pakhatin foreigner pariat an nei thei a, Kalidou Koulibaly hi player pariatna a ni. Chutihrualin player paruk hi chu Al Hilal-a awmsa an ni a, nipui transfer-ah chuan Koulibaly bakah club record-in Neves chu pound maktaduai 47 zetin Wolves aṭangin an lalut.

Koulibaly chuan, "Ka match hmasa ber aṭanga a tawp ber thlengin Chelsea kawr ka hak theih avangin ka inchhuang. Chutihrualin kan khelh dan erawh kan beisei ang leh kan duh dan a ni lo. Fan-te chungah erawh a tawp thlenga min thlawp avangin ka lawm," tiin Chelsea a thlah.

Stamford Bridge a pan hmain Koulibaly hian Napoli chu Italian Cup 2020-ah a champion pui a, an ram Senegal pawh Africa Cup of Nations-ah kum 2022 khan a champion pui bawk.

Season liam ta khan Al Hilal hi league-ah pathumna an ni a, Cristiano Ronaldo khelhna Al-Nassr hnuai chiahah awmin champion team chu Al-Ittihad an ni.

Saudi leh player ṭha

Champion team Al-Ittihad-in Ballon d'Or kawltu Karim Benzema leh midfielder ṭha mi N'Golo Kante te an lalut tawh a, an thawm a ring hle. Pahnihna Al-Nassr pawhin Cristiano Ronaldo an chelh dawn bakah Hakim Ziyech leh Marcelo Brozovic te lakluh tumin hma an la mek.

Kum 30 mi Ziyech leh Saudi club hian inremna an nei hnai a, he thu i chhiar meuh chuan a chiang tawh thei bawk. Brozovic chungchang pawh Inter leh Al Nassr te an inrem hnai a, Croatian midfielder hi euro maktaduai 23 man bawr vel a ni dawn. Chutihrualin thutlukna tawp siamtu tur chu Brozovic a ni ang.

Roberto Firmino pawhin Liverpool a chhuahsan tur thu a tichiang tawh a, a pan tur lam a chiang lo. Al Ahli-in Firmino hi June 2026 thleng daih contract an zawrh a, Brazilian forward hi thutlukna siamtu tur a ni.