Messi-a'n PSG ṭantute mak a ti lo

Lionel Messi chuan Paris Saint Germain fans lamin an auh el chungchang a sawi chhuak a, an thil tih chu an tih ṭhan leh tih ṭhin dan pangngai ve mai nia a hriat thu a sawi.

PSG tana a hun hnuhnung lamah Messi hian lawm a hlawh lo, fans lamin an au el hial. Messi chuan, "Tun hmain Kylian Mbappe chungah a thleng a, a hnuah Neymar chungah a thleng, ka chunga a thleng ve kha mak ka ti lo.

"An tih ṭhin dan phung pangngai ni maiah ka ngai," a ti. Mabppe hian hmanni deuh khan Messi hian a phu tawk ang zahna a dawng lo niin a lo sawi chhuak tawh bawk - season hnih hun a hmanna kha ṭha takin a mangṭha hran lo a ni.

PSG lamin an remti lo chung Messi hi Saudi Arabia ramah a zin lui a, hrem a ngai hial - hremna erawh a hnuah tihnep leh a ni. Mi ṭhenkhat chuan Qatar World Cup-ah Argentina-in France an hneh vang khan Messi chungah an lawm lo niin an sawi bawk.

Mahse, Messi chuan, "World Cup a thil thleng avang kha chu niin ka hre lo," a ti. Barcelona captain hlui hian Inter Miami a zawm dawn a, football huangah hlawhtlinna awm thei ang chu a chang kim tawha a hriat thu a sawi bawk a ni.