TATA SK 712 Pro Volleyball Semifinal : Chhinga Veng leh Hunthar tan fiahna
Zanin dar 8:00 hian Chhinga Veng Spikers leh Hunthar ten Tata SK 712 Pro Volleyball League semifinal an khel dawn. Volleyball ngaina veng pahnih an ni a, sulhnu nei ṭha an ni bawk - veng pahnihten a hmuna thlawptu nei ṭha zawk nih an tum ang.
R. Dengṭhuama Indoor Stadium, Mualpuiah mipui an pungkhawm hnem dawn a, ṭhutna ṭha chang duh tan kalhma a finthlak ang. A chak zawk hian nizana Thutak Nunpuitu Team (TNT) leh Tuichangral inkhela chak zawk nen nomawi an inchuh dawn a ni.
Chak nawn tum
Hunthar leh Chhinga Veng Spikers te hi league round hnuhnung berah an intawng a, semifinal lut chiang tawh an ni - semifinal thlirlawkna inkhel anga sawi inkhelah hian Hunthar hi 3-2 in an chak.
Chak nawn an tum thu sawiin Hunthar coach VL Malsawma Renthlei chuan, "Kan intawn hmasak kha chuan ka team zirchianna hun angah an hmang ni deuhin kan hria, chuvangin a vannei zawk ni mah ila semifinal atan chuan chak chiang sa kan awm lo.
"Ka nauten an theihtawp an chhuah dawn a, team ṭha lo zawk anga ngaih ni mah ila kan ṭhat dan taka kan khel chhuak thei a nih phawt chuan hneh nawn kan tum ngam," tiin Vanglaini a hrilh a, PVL semifinal an khelh hnuhnung pahniha an vanduaina ang tawn nawn loh a duh.
Hunthar hian 2017 leh 2018 khan PVL nomawi an chawi, mahse semifinal an khelh hnuhnung pahnihah Chhinga Veng leh TNT an ngam lo - kuminah erawh Spikers hneh a tum ruh hle a, veng mipui puihna an mamawh tel bawk ang.
Punjab captain ni lai Gagandeep Singh an nei a, 6ft 3in a sang Gagandeep hian match nga aṭangin point 110 a nei thei. Zomuansanga leh Laldensanga ten an thlawp ṭha a nih chuan Spikers hneh an tum ngam ang.
Spikers beiseina
An intawn hmasakna kha a la rei lo, kar hmasa Zirtawpni mai kha a la ni. An inkhelh aṭanga ni nganaah an intawng leh dawn - Chhinga Veng Spikers coach Jesse Lalpianpuia chuan Hunthar lakah hnehna chan let theih a beisei thu Vanglaini a hrilh.
League round-a an inkhelh ṭum khan, set thumna leh set linaah Javed Khan an hahchawlhtir, hei vang hian an ṭhat dan berin an khel rih lo tihna a ni. Jesse chuan, "Hneh let ngei kan tum, ka naute an theihna ang taka khelh chhuahtir theih pawh ka inbeisei," a ti.
Coach Jesse-a hian training an neihnaah an player Lalchungnunga'n a ke a bilh tih a sawi a, zaninah a inlan dawn leh dawn loh a sawi chiang thei lo, player dang erawhin harsatna nei loin Hunthar an hmachawn thei ang.
Chhinga Veng hian 2019 khan PVL nomawi an chawi a, mahse an champion aṭanga an season hman lehna hmasa ber nikumah erawh an che chhe takzet, chak ni hmel hmu miah loin an tla - an tan season duhawm lo berte zinga mi a ni.
Mahse, kuminah season hmasa champion Durtlang North aṭangin Lalbiakmuana an lalut a, state pawn player ṭha Javed Khan bakah zuang sang thei tak K. Lalfakawma leh captain leh setter ni bawk David Lalramhmachhuana an neih avangin champion an tum ngam.