PVL final khel tur Kanan

Tata SK 712 Pro Volleyball League hmeichhe inelna lamah Kanan chuan final an lut, semifinal inkhel hmuhnawmah Kanan hian Bethlehem Vengthlang chu 3-0 (25-12, 25-17, 25-17) in an hneh a ni.

Thawhṭanni zan R. Dengṭhuama Indoor Stadium, Mualpuia inkhelah a tir aṭangin Kanan an chungnung a, set thum an khelh chhungin dinhmun hlauhthawnawma din lai an nei loa tia sawi theih a ni hial - an phu ang ngeiin final an lut.

A thiam ber zawnna final hi June 29, Ningani zanah an khel dawn; Kanan hian league round lama sang ber leh Bungkawn hnehtu Luangmual nen nomawi an inchuh ang, inkhel a hmuhnawm leh dawn tih a chiang.

Kanan tan R. Laltleipuii a hmuhnawm, ani hian point 16 ngawt vaw thlain ṭum khat chiah tihsual a nei. Point sarih nei thei pahnih Lalramliani leh Lalhriatpuii te pawhin vawi khat chiah tihsual an nei a, an chakna hnar pawimawh an ni.

BVT lamin Mizo spiker ṭha zinga mi Elisian Meida chhawr an tum viau a, ball pawh an pe hnem malh malh hle - mahse point 10 bak a nei thei lo a, tihsual ṭum sarih ngawt a neih bawk avangin team chak nan a tawk zo lo.

Tun season chhungin Kanan hian nomawi pahnih an la tawh, a hlu ber PVL nen a lungthu kima season khar an tum dawn. Team ṭha Luangmual chu an hmabaka ding tur an ni a, an hna erawh a hautak ang.