All India Sub Junior champion H. Lalṭhazuala

Yonex Sunrise All India Sub Junior Under 15 & 17 Ranking Badminton Tournament-ah H. Lalṭhazuala chu Boys' Singles-ah a champion a, India rama kum 17 hnuai lam zingah Ṭhazuala aia badminton thiam zawk an awm lo - Ṭhazuala hian first round aṭanga final match thleng hian game hloh nei miah loin, straight set vekin hnehna a chang thei a ni.

Chanmari West rawlthar Ṭhazuala hian final-ah hian Telangana rawlthar Pranauv Ram N. chu 21-16, 21-16 in a hneh a, harsatna a tawk lo. Ṭhazuala hian semifinal-ah pawh Gnana Dattu T.T chu harsatna awm loin, 21-11, 21-16 in a lo hneh tawh bawk a, champion a phu hle - first round aṭanga final thlengin harsatna a tawk lo a ni ber!

Ralte Villa Badminton Club player Ṭhazuala hian All India Sub-Junior Ranking Badminton Tournament, February thlaa neihah khan nomawi a lo vaw chhuak tawh bawk a, kum bithliah inelnaa India rama champion hi a tan thil thar a ni lo. Hemi ṭum pawh hian final-ah harsa lo takin Malemnganba Singh Hemam chu 21-16, 21-15 in a hneh a ni.

Tata Trust hmalaknain Ṭhazuala hi Pullela Gopichand Badminton Academy, Hyderabad-ah a inzir mek a, seeded no. 6 ni chungin he tournament hi a hmachhawn - beisei ang ngeiin nomawi a chawi zui.

Ṭhazuala chuan, "Champion ka beisei ngam lo a, ka rin phak baka ṭhain ka inkhel. Pathian min awmpuina vang liau liau a ni e," tiin Vanglaini a hrilh a, July-ah India huap inelna senior leh Under-19 a hmachhawn lehnghal ang.

June 20 aṭanga neih ṭan inelna hi Lucknow khawpuiah nghah niin, Serchhip rawlthar Malsawmhlua (Mama), Ralte Villa BC chuan Andhra Pradesh lam mi Mahendra Kalahasthi nena ṭang dunin U15 Boys' Doubles final an lut bawk a, mahse, seeded no.1 Arjun Tanaji Birajdar leh Aryan Tanaji Birajdar te ṭang dun chu 17-21, 26-24, 20-22 in an hneh lo - a vanduai zawkah an ṭang.

Mama hian thlatir khan Yonex Sunrise 2nd Ashwini Gupta Memorial All India Sub-junior Ranking Badminton Tournament 2023-ah U15 Boys' Doubles champion dinhmun a lo luah tawh a, tuna a ṭanpui Andhra Pradesh lam mi Mahendra Kalahasthi nen hian an lo champion dun tawh a ni - tun inelna final-a an ngam loh Arjun leh Aryan te ṭang dun hi an hneh a, tunah an hneh lo ve ta thung.

Serchhip naupang ṭhangduang Mama pawh hi Ṭhazuala ang thoin Pullela Gopichand Badminton Academy (PGBA), Hyderabad-ah a inzir mek a, nimin final-ah chak zo lo mah se hmabak a nei êng hle.

Durtlang rawlthar Lalramsanga chuan U17 Boys' Doubles category-ah semifinal a lut ve bawk a, Ralte Villa BC player erawh final a invawkai zo ta lo a ni.

Mizoram Badminton Association (MBA) chuan thuchhuah siamin, "Zuala, Ramsanga leh Mama te kan lawmpui takzet a, India tihmingṭha zel turin duhsakna kan hlan a ni," an ti.

MBA hian NEIDA (Tata Trust) leh Mizoram State Sports Council-te nena thawk hoin Mizo naupang hoin badminton-a hma an sawn theih nan theihtawp an chhuah a, Ṭhazuala pawhin Gopichand academy-a awm chu a chhawr thu a sawi.