Vawiin aṭangin TT inelna lian an khel ṭan dawn

Mizoram Table Tennis Association (MTTA) buatsaih, season kal laia a hmasa ber tur - MTTA Season Opening Table Tennis Championship 2023 chu vawiin aṭangin MTT Hall, Kawltheihuan, Mission Veng-ah khelh ṭan a ni dawn.

TT inelna hi ni thum chhung neih tur a ni a, June 30, Zirtawpniah a hmawr bawk tur a ni. Ni tawp ber inkhelte hi MTTA YouTube leh Instagram lamah live hmanga pek chhuah a ni dawn, mahni awmhmun aṭangin a en theih dawn tihna a ni.

Tun ṭumah hian category 16-ah inelna hi neih tur niin, season danga telh ngai lem loh men’s doubles leh mixed doubles telh thar a ni a, category la awm ngai lo - men’s & women’s above 30 singles telh thar a ni bawk.

Tualchhung TT inelna lianah hian Mizoram chauh ni lo India ram huapa hriat hlawh Jeho Himnakulhpuingheta, Techmaze TT Club a inlan thei dawn a, ani hi Inter Branch YMA TT Championship neih zawh taka champion kha a ni.

Mizo zingah Jeho-a hi European League khel thei awm chhun a la ni a, tunah hian July 28 aṭanga September 8 chhunga khelh tur World University Games-ah Indian University Table Tennis Team aiawh tur a ni, a hun awlah tualchhung inelna a hmachhawn dawn tihna a ni.

Jeho-a bakah hian Inter Branch YMA lama che ṭha Alberto LR Ruata (Electric Veng TT Club) leh hmeichhe champion Lalthansangi Sailo (Techmaze TT Club) leh Vanlalnghaki (Electric Veng TT Club) te an inlan thei dawn.