Mizo tlangval telna NE team inlan dawn

Vawiin chawhma dar 9:30 hian Duleep Trophy 2023-ah North East Zone leh North Zone an inkhel dawn. India rama cricket thuneitu sang Board of Control for Cricket in India (BCCI) hnuaia inelnaah hian Joseph Lalthankhuma chu NE team zingah hian a tel.

Mangalam Chinnaswamy Stadium, Bengaluru-a inelna hmachhawn turin NE team hian inbuatsaihna an nei ṭha a, a huhoa ni kua an training hnuin inelna neihna tur hmun hi Pathianni khan an pan tawh a ni.

Ramhlun Venglai tlangval Joseph Thankhuma chuan, "Inenchhinna kan neih hmasak zawkah ka khel ṭha tawk lo, a vawi hnihnaah erawh ka bat theih hun chhung chu out loin ka vawng tluan thei hlauh.

"Pathian hruainain inbuatsaihna ṭha tak kan nei thei a, coach leh captain pawhin ka chungah rinna an nghah ngam ka beisei," tiin Vanglaini a hrilh a, cricket inelna lianah Mizo hming tiṭhatu nih ngei tuma theihtawp a chhuah tur thu a sawi bawk.

Duleep Trophy hi BCCI hnuaia inelna pawimawh niin, kum 1961-62 season aṭanga khelh tawh kha a ni a, tun hma chuan India ram hi hlawm hrang (zone) pangaah ṭhen hran ṭhin niin, 2019-20 aṭang khan NE Zone an siam belh a ni.