Vision 2030: Khawvel thunun tumtu Saudi Arabia

Cristiano Ronaldo-a'n Saudi Arabia a pan khan mi tam tak beng a verh ṭan a, a career tawp lam pan tawh footballer-in a hun tawp hman nan hman a tum ang lekah a ngaih theih thung - mahse, hetah hian Saudi Arabia-in tawp an lo tum hauh lo!

Nipui transfer an inhawng meuh chu football khawvela hming langsar tak tak chu Saudi Arabia nen sawizawm an ni a, Lionel Messi-a'n USA lam hawisan mah se Karim Benzema, N'Golo Kante, Ruben Neves leh Kalidou Koulibaly te chu tun hnaia Saudi pan zinga mi an ni.

Hetah hian a la tawp mai dawn lo - Chelsea winger Hakim Ziyech, goalkeeper Edouard Mendy, Inter Milan midfielder Marcelo Brozovic leh Liverpool striker hlui Roberto Firmino te pawh Saudi pan mai thei dinhmunah an ding a, he thuziak i chhiar meuh chuan an pan fel tawh hial mai thei.

Nipui transfer a inkhar meuh chuan European football-a player langsar tak takin Saudi club-ah an hming an ziak lut tawh ang tih a chiang a, Mizoram aṭang pawhin ṭum danga kan ngaihven ngai loh Saudi Pro League hi ngaihven fo a ngai tawh dawn.