Saudi tana danglamna thlentu MBS

Mi tam tak thinlunga zawhna awm kan hria a, chu chu engvangin nge Saudi hian heti taka footballer langsar lakluh tuma hma an lak? tih a ni a, khawi aṭang zozaiin nge sum an neih, tih pawh hi zawhna zawh awm tak a ni tel.

Saudi Crown Prince leh Prime Minister ni bawk Mohammed bin Salman hi hma latu langsar a ni - an ram mipui mai ni lo, khawvelin Saudi a hmuh dan hi thlâk a duh a, chumi atan chuan sum sen pawh hreh loin, infiamna hmangin hma a la.

MBS tia hminglem an pek Saudi hruaitu hian mimal zalenna rah behna, neih inang inkawp hmuhsitna, thusawi kawnga zalenna tlem lutuk leh hmeichhe dinhmun rah behna avanga an ram hmingchhiatna chu nuai reh a duh a, a kalkawng awlsam berah infiamna hi a ngai.

Saudi hian an ruahman dan chuan kum 2030 a thlen meuh chuan infiamna hrang hranga world championships 25 tal thlen hman an tum a, World Cup 2030 emaw 2034 thlen an tum bawk - MBS hian FIFA president Gianni Infantino bula ṭhu chungin World Cup match kha a en nual tih theihnghilh loh a ṭha!

Player lak luh dan

PIF-in club a lei pali bakah hian Al Qadsia, Al Ula leh Al Diriyah te pawhin sorkar aṭangin puihna an hmu. Season thar atana ruahmannaah chuan PIF club palite chu a tlem berah club pakhatah khawvel huapa hriat hlawh player pathum ṭheuh kawl tura beisei an ni.

Player dang chu a ṭul dan a zirin league club dangah sem tur an ni dawn. A awmzia berah chuan Saudi football-in ngaihven a hlawh theih nan sorkarin kil tinah hma a la a ni ber a, club ho hi chu a lo dawngsawngtu an ni ber.

Tuna an kal danah chuan club hoin an player duh an zawng a, Saudi Pro League pawmpuina an hmuh hnuah sorkarin sum a pe ṭhin. Mahse, star langsar zual Ronaldo emaw Messi emaw Benzema ang chiah chuan sorkar a inrawlh thuk lehzual.

Sorkar aṭangin PIF, Ministry of Sport leh Ministry of Tourism aiawhten indawrna an kalpui a, direct-in player an dawr mai ṭhin. Inremna an neih vek hnuah club lam an hrilh ve leh a, club lam aiawhin contract-te buaipuiin, official-a puanzarna chu an kalpui thung.

Wonder Sports and Enter-tainment Group agent Thierno Alimou Diallo chuan, "Bin Salman ngei hian an ram tihlar nan player langsar tak tak lakluh a duh thu club ho hnenah a sawi a, club tenau ho tan thleng pawh a ti.

"MBS hian, 'In player duh chu sawi ula, in account-ah pawisa ka lo dah ang,' a ti mai a ni. Tichuan club aiawhte hian player-te tana hnar rual loh khawpa tam sum an va tawktarh ta ṭhin a ni," a ti a, MBS-a'n sum a sen nasat thu a sawi.

Hetihrual hian sumin engkim an tithei bik lo. Ilkay Gundogan, Eden Hazard, Hugo Lloris leh Son Heung-min te pawh thlem ni mah se, Saudi lam pan ai chuan European football-a inelna hmachhawn an thlang.

Coach zingah pawh Steven Gerrard, Juventus boss Massimiliano Allegri leh Rafael Benitez te an dawr a, mahse, European football-ah pawh coach langsar ni phak pathum hian Saudi sawmna pawm ai chuan hlawh tlêm zawka Europe-a awm an thlang zawk.

Ram mipui duh football-ah sum an seng

Saudi Arabia-a mihring cheng 70% hi kum 35 hnuai lam an ni a, football an atchilh êm êm bawk - MBS hian hei hi a hai lo a, tun hnaiah ṭhalai zinga an ram sorkar sawiselna ri leh ṭhin chu a hre ve ran a, football hmangin an ram mipuite hi hneh a tum niin an sawi.

Skema Business School, France-a sport & geopolitical economy professor Simon Chadwick chuan, "Saudi hian ṭhalaite an hel a, an ram rorelna duhkhawp lo a, lal chhungkaw paih thlak tuma hma an lak mai an hlau a, an lungawi lo tihlungawi nan an duh apiang pek an tum a ni ber.

"A nihna takah chuan, 'Cristiano Ronaldo leh Lionel Messi in duh pawhin sawi mai ula, kan pe mai ang che u,' an ti a ni ber a, mahse, chumi phena awm erawh, 'In duh kan pe che u ang a, mahse, min sawisel suh u,' tih hi a ni," a ti.

Saudi PIF hi tam tak chuan Newcastle United-a 80% share nei ang chauhin kan hre mai thei. Mahse, tun nipuiah PIF hian an ram club pali Al Ittihad, Al Hilal, Al Ahli leh Al Nassr te an lei a, anni chauh lo, an ram club dangah pawh an sum tam tak an seng bawk.

Saudi League a him chiah em?

Sum tam avangin Saudi hian sawi hlawh viau mah se derthawnna erawh a tam ve tho - football player intelkhawm pawl FIFPRO chuan nikum nipui lai khan an member-te chu Saudi club zawm lo turin an rawn a, player hlawh pek tlak loh an chin vang a ni.

FIFPRO hian Saudi bakah hian Algeria, China, Romania leh Turkey chu hlawh bat ching zingah hian an tarlang a, November thla pawh khan Ronaldo khelhna Al Nassr chu Brazilian midfielder Petros hnenah an inremna anga pawisa an pek loh avangin $2.5mtd pe tura hriattir an ni.

March thla lawk khan Al Ahli chu an player Lewis Grabban-a contract an tihtawp danah thiam loh chantir an ni a, a hlawh an batsak $500,000 pe tura tih an nih bakah an inremna an zah loh avanga $700,000 chawi tura hriattir an ni bawk.

Tun hnai thla 12 chhung khan FIFA chuan hlawh vanga buaina chungchanga Saudi club buaina 50 vel chu a ngaihtuah a ni. Hei chauh a ni lo - Saudi lamin player langsar tak tak an lalut anga a lar viau lai hian European club lian ṭhenkhat chuan an player hlawh hnem si, chhuahtir maina tur an hriat lohte chhuahtir nan Saudi lam hi an melh mek niin an sawi!

Hriselna leh Sum

Saudi sorkar hian ngaih pawimawh tak pakhat a nei a, chu chu an ram mipui hriselna a ni. Tun hnai zirchianna aṭanga a lan danin Saudi mipui zinga 60% chu an rih tur ang aia rit an ni a, hei hi Saudi sorkar chuan a ngai thutak hle.

An ram mipuite an hrisel zawk nan taksa sawizawi leh infiamna lam uar turin Saudi sorkar chuan a duh a, Saudi Arabian Football Federation president Yasser Al-Misehal chuan an rama mipa footballer 21,000 inziak lut mek chu mi 200,000-a tihsan an tum thu a sawi.

Hei chauh a ni lo. Bin Salman-a ruahmannaah chuan infiamna hian Saudi economy-ah thui tak hna a thawh theih a ring - he ram hian oil vangin sum tam tak nei mah se, infiamna hmanga sum tam tak lakluh a, an ram economy ṭhantir zel chu an ruahmanna a ni. Chumi atan chuan an inseng hmasa a ni ber.

Saudi sorkar hian Vision 2030 an ruahman danah chuan, an ram league hi 2030-ah chuan tuna a hlutna let thuma hlu thei tura duan an tum a, chu chu pound tluklehdingawn 1.7 hu a ni - hei vang hian ticket man pawh a to ve zel a, Ronaldo-a'n Saudi a pan hnua ticket man chu SAR 10 (Rs. 218) aṭangin SAR 150 (Rs. 3,280) ah a kaisang thei.

Saudi leh infiamna dang

Saudi Pro League hi sports intelligence agency Twenty First Group-in an tehna aṭanga a lan dan chuan, khawvela league san lamah 58-na a ni a, 49-na Scottish Premiership pawh a la phâk lo hle.

Hetiang boruak karah hian Saudi Pro League hian an tum ber chu kum 2020-ah chuan khawvela league ṭha zual 10 zinga tel phak a ni a, hna awlsam erawh a ni lo ang - December-a khelh tur FIFA Club World Cup chu Jeddah khawpuiah Saudi hian an thleng dawn.

Saudi hian football chauh an luhchilh lo - boxing match langsar ber ber pawh tun hnaiah a thleng fo a, tun thlatirah khan golf khawvel meuh pawh luhchilhin, PGA Tour chuan Saudi PIF enkawl LIV Golf nen inremna an nei bawk.

Ruahmannaah chuan PIF hian dollar tluklehdingawn thum vel chu he inremnaah hian an seng dawn a ni. Saudi PIF hian tennis an thlithlai mek bawk a, ATP Tour chair Andrea Gaudenzi chuan tun kartir khan Saudi PIF nen inbiakna ṭha tak an neih thu a sawi.