Man City lei dilna an hnawl

Premier League champion Manchester City chuan pound maktaduai 90 hum chungin Declan Rice lei dilna chu nimin khan West Ham hnenah an va thehlut a, mahse Hammers chuan an captain lei dilna hi an lo hnawlsak.

Man City hian Rice manah hian pound maktaduai 80 pek phawt a, hemi bakah hian pound maktaduai 10 danga pung chho leh turin an dawr a ni. Citizens leh Arsenal ten Rice lei an dilna zat hi a inang a, pawisa pek an tum dan erawh a inang lo deuh thung.

West Ham chuan an captain hi a chhuak dawn tih an chiang tawh a, a chhuahna tur zawk erawh a la fel lo. London club hian pound maktaduai 100 aia hniam chuan an captain hi chhuahtir an tum lo niin a ngaih theih.

Kum 24 mi Rice hian Hammers tan kum 2024 thleng daih contract a nei mek a, a pawtsei lo emaw tun nipui bazarah a chhuak lo emaw a nih chuan season tharah a thlawnin a chhuak thei dawn - tun hi man tam tham taka hralh theih hun a ni.

Europa Conference League champion hian a thlawna chhuahtir ai chuan sum tam tham tak lakluh nana hman an duh, tunah chuan Arsenal nge Manchester City ten pawisa thehchhuak hnem ngam zawk tih chu an ngaichang ni berin a lang.

Arsenal lamin lei an dilna hmasa pahnih chu an lo hnawlsak tawh a, a vawi thum nan Hammers nen hian an indawr dawn - Man City hian eng anga nain nge an chuh zui dawn hriat a la ni lo bawk.

England international midfielder Rice duhthlanna a pawimawh dawn, chutihrualin a club khelh mekna West Ham hian sum an duh miau avangin pawisa hmang huai zawk club lam a pan a rinawm.

Man City hian Chelsea aṭangin Mateo Kovacic chu pound maktaduai 25-in an lei fel tawh a, an captain Ilkay Gundogan erawhin a contract hmang zoin Barcelona a pansan thung - manager Pep Guardiola tan Rice lakluh hi a pawimawh.

Midfield chauh ni loin tlarhnung lam pawh thuam chak an tum. RB Leipzig defender ṭha Josko Gvardiol lei tumin an hel mek, German club chuan an defender hi a tlem berah pound maktaduai 85.77 lo chuan chhuah an remti lo.

Croatia international Gvardiol hi kum 21 mi chauh a la ni a, hmabak nei êng tak a ni. Qatar World Cup-ah khan a khel ṭha hle, coach Guardiola chu amah duhtu langsar zinga mi a ni.

BBC-in an tarlan dan chuan Gvardiol leh Man City te hi an inbe tawh a, an thu pawh a inhmu viau. Tuna a contract nei laiah hian, amah lei chhuak duh tan pound maktaduai 94.35-in a lei theih ang, tih a tel, Croatian defender la tur chuan sum hman hnem a ngai dawn.