Manager thar Postecoglou leh Pochettino

August 11, Zirtawpni zan aṭangin Premier League khelh ṭan a ni dawn a, match hmasa berah champion lai Manchester City-in kai thar Burnley an hmachhawn ang.

Championship aṭangin Premier League khel tura tling tharte chu Burnley, Sheffield United leh Luton Town te an ni a; Clarets manager Vincent Kompany, Blades manager Paul Heckingbottom leh Hatters manager Rob Edwards te hi manager thar tia sawi theih an ni. Chutihrualin Tottenham Hotspur lakluh thar Ange Postecoglou leh Chelsea boss thar Mauricio Pochettino te hi en bik tur an ni thung ang.

Australian coach Postecoglou

Tottenham-in nomawi chawi an harsat a, London club-ah hian manager langsar Antonio Conte leh Jose Mourinho te meuh pawh an hlawhtling lo. Chelsea manager thar Pochettino pawhin Spurs hi nomawi a chawipui thei lo.

London club hian June 6 khan manager thar atan Postecoglou an lalut a, Australian coach hian season hnih chhung Celtic a enkawl chhungin a champion pui ve ve. Tottenham chairman Daniel Levy chuan, "Ange kan la thei hi kan lawm a, a hnuaiah hian game rang leh attacking game kan khelh theih kan beisei a ni," tiin a sawi.

Kum 57 mi Postecoglou hi Athens, Greece-ah a piang a, kum 1967 khan a pa sumdawnna a tlakchhiat avangin lawng hmangin kum 1970 khan Australia-ah an pem a, Melbourne-ah a sei lian. A inkhelh hun laiin defender a ni a, Australia tan pawh match li a khel. Australia ram chhung club hrang hrang a enkawl a, national team hial a enkawl hnuah kum 2018 khan J League club Yokohama F. Marinos a enkawl. J League aṭang hian kum 2021 khan Celtic a pan a, Scottish club-a a chet ṭhat avang hian Spurs a zawm theih phah.

Kum 2019 hnuah Spurs hian manager pasarih (a nghet lo telin) an nei tawh a, hei vang hian Postecoglou hian result ṭha a nei lo a nih chuan ban theih dinhmunah a ding tih a hria ang. Season liam ta khan Spurs hi pariatna an nih chauh avangin Postecoglou hian hna pawh a ngah nghal hle.

Spurs captain Hugo Lloris hian tam tan inkhelh a chawlhsan tawh a, chutihrualin kum 36 a ni tawh a, Spurs chhuahsan tur anga sawi a awm bawk. Vice catpain Harry Kane-a hma lam hun a chiang lo a, chutihrualin Spurs-in Son Heung-min an chelh thei dawn a; Dejan Kulusevski leh Richarlison te an la awm bawk. Engpawh chu ni se season an hmang ṭha lo a, transfer hman ṭhat a pawimawh hmasa ang.

Poch-a'n hna a ngah

Chelsea-in May 29, 2023 khan Mauricio Pochettino an lakluh thu an puang a, Argentine manager hian July 1, Inrinni aṭangin hna a ṭan dawn. Transfer bazar lamah Blues an buai ṭan hle. Nipui bazarah N'Golo Kante, Kalidou Koulibaly leh Édouard Mendy te an chhuahtir tawh a, player chhuak tur dang pawh an la ṭhahnem.

Mateo Kovacic chuan Manchester City a pan dawn tih a chiang tawh a, Mason Mount pawh chhuak thei dinhmunah a ding. Forward Kai Havertz leh Hakim Ziyech te pawh chhuak ngei tura ngaih an ni.

Chutihrualin Blues hian RB Leipzig aṭangin Christopher Nkunku an lalut fel tawh. Poch-a hna hmasa tur chu a mamawh chin player tihchian a, mamawh loh chhuahtir a ni ngei ang. Todd Boehly-a'n neitu nihna a chan hnuah Chelsea-in uchuak takin player an lalut a, nipui bazar hi inṭhuahfai hun a ni ang.

Poch hian Spurs a chhuahsan hnuin PSG a enkawl a, a hnuaiah Lionel Messi, Neymar leh Kylian Mbappe te an khelh tawh avangin tawnhriat ṭha tak a neih belh. Argentine manager hnuaiah Chelsea-in beiseina an nei sang dawn a, pressure a tam dawn. Graham Potter leh Frank Lampard te hlawhchhamna hmunah hian Poch-a theihna fiahin a awm ang.

Engtin zel?

Premier League-ah inelna a sang a, club pawhin manager an kawl rei thei lo. Tun dinhmuna club pakhata manager ni rei ber chu Jurgen Klopp a ni a, German manager hian October 2015 aṭang khan Liverpool a enkawl ṭan. Season liam ta khan Reds hi an che ṭha lo a, Klopp ban thawmte a ri hman hial.

Pep Guardiola-a'n July 2016 aṭangin Man City a enkawl ṭan a, Spanish manager hian record a neih ṭhat avangin ban thawm a awm ve lo - club thuneituten rei tak chelh an duh. Brentford manager Thomas Frank hi a rei leh bawk a, Danish manager hian kum 2018 aṭangin Bees a enkawl ṭan.

Mikel Arteta pawhin December 2019 aṭangin Arsenal a enkawl ṭan a, hemi thla vek hian David Moyes-a'n West Ham a enkawl ṭan bawk. Manager dang 15 te chu kum 2020 hnu lam vek an ni tawh. Chutihrualin manager hna chelh rei Pep leh Klopp te hi season tluan daih ngei tura ngaih an ni a, thil chiang erawh manager 20 zingah hian season tluan daih lo an awm dawn.