Rinkai ber chu Djokovic - Alcaraz

Mipa tennis thuneitu sang Association of Tennis Professionals (ATP) chuan ranking thar an ti chhuak a, a chung berah Carlos Alcaraz a awm - world number 1 ni mah se Alcaraz chuan Wimbledon atan Novak Djokovic chu champion tura rinkai ber a ni tih a sawi.

Spanish tlangval Alcaraz hian Queen’s Club Championship-ah hlawhtlinna a chang a, grass court-ah pawh a inkhel thiam tih a takin a lantir. July 3, Thawhṭanni aṭangin All England Club, London-ah Wimbledon an khel ṭan leh nghal ang.

Kum 20 mi Alcaraz chuan, "Wimbledon atan inrintawkna pawh ka nei sang hle, a chhan chu grass court-ah chawlhkar khat chhung ṭha taka ka khelh theih vang a ni, chuvangin Grand Slam kan hmabakah pawh champion thei zingah chuan ka tel theiah ka ngai.

"Ka thlir dan chuan Wimbledon champion tur atan Novak Djokovic chu rinkai ber a ni, a lo hlawhtlin fo tawhna hmun a ni bawk. Chutihrualin kei pawhin theihtawp ka chhuah dawn," tiin a sawi.

Serbian star Djokovic hian Wimbledon nomawi hi vawi sarih a chawi tawh, an khelhna hmunpui ber Centre Court bikah phei chuan kum 10 chhung chu tlawm loin a inlan tawh - kuminah pawh midang tan hmachhawn a châkawm loh ang.