NorthEast United-in striker thar lalut

ISL club NorthEast United FC chuan Saudi Arabian Division 1 club Al-Qadsiah FC aṭangin Andy Keogh an lalut a, he thu buatsaih a nih lai hian NorthEast United lam chuan official taka puanzarna la nei lo mah se Vanglaini chuan Highlanders hian player hi an lalut ngei tih official aṭangin a dawng. 

Highlanders hian season ṭan dawna boruak nei hat khawpa an lakluh Asamoah Gyan chu hliam vangin tun season chhung an chhawr thei tawh dawn lo a, Ghana legend hmun ruak luah turin kum 33 mi striker hi an lalut ta a ni. 

Wolverhampton Wanderers tan pawha lo khel tawh striker hian Cardiff City, Bristol City, Leeds United, Bury FC leh Blackpool tan pawha lo khel tawhin tawnhriat a ngah tawh hle.  Andy hian Republic of Ireland tan match 30 khelin goal hnih a khung tawh bawk.Asia khawmualpui lamah chuan 2019-a Saudi a pan hma hian Thai Premier League club Ratchaburi leh A League club Perth Glory tan te a lo khel tawh a.  

Highlanders hian Arsenal Under-18 captain hlui Jay Emmanuel-Thomas chu lakluh an tum hmasa zet a, mahse kum 29 mi striker hian fitness test a paltlang lo niin an sawi. Zanin dar 7:30-ah Highlanders-in ISL match an khel dawn a, khualmualah Chennaiyin FC an lenchilh dawn.