Zaninah PVL hmeichhe final; Luangmual hmaah Kanan

Tualchhung volley-ball inelna lian leh ngaihhlut hlawh ber Pro Volleyball League chu a hmawr an bawk chho dawn ta, zanin dar 8:00 hian hmeichhe final khelh a ni ang. Luangmual leh Kanan ten nomawi an inchuh dawn a ni.

R. Dengṭhuama Indoor Stadium, Mualpuiah volleyball ngainatute tan inkhel hmuhnawm a awm dawn a, mahni in lum aṭanga en duh tan LPS-ah en theih a ni bawk ang; TV leh YouTube lamah en theih a ni dawn.

Luangmual tan PVL hi an season hmasa ber a ni chauh, chutichung chuan state pawn aṭanga player lalut awmchhun an ni. Gujarat tleirawl Nipa Barad an nei a, ani ho hian hneh loh nei miah loin league round an khel zo.

League round-ah hian zanina an tum tur Kanan ngei pawh hi 3-1 in an lo hneh tawh, semifinal-ah pawh harsatna an tawk chuang lo. Volleyball inelna sang an hmachhawn hmasak bera champion turin match khat chauh an hmabak tawh a ni.

Barad-i chauh a ni lo - Lalmuanpuii, Hmingṭhazuali leh R. Malsawmtluangi te an awm a, anni hi hmuhnawm khawpa khel chhuak thei vek an ni; Kanan lakah pawh hian rinkai zawk ni chungin an inlan dawn.

Kanan tan beisei tur awm lo erawh a ni bik lo, an intawn hmasak pawh hian set la hmasa zawk an ni. R. Laltleipuii leh Lalramliani te hi na taka ball vaw thei an nei a, anni pahnih an chet fuh ṭum a nih bakah Lalhriatpuii, Lalbiakngheti leh B. Tlangmawiin Varte te khel ṭhat ni a nih bawk chuan Luangmual hneh turin theihna an nei.

Champion an tum a nih chuan Kanan hian tih tur pawimawh an nei, chu chu an inkhelh hmasaka point 38 tehmeuh neitu Nipa Barad-i ven dan tur an ngaihtuah chhuah a ngai, a ball vuak hmasa lam an dansak theih a nih chuan inkhel boruak a danglam phah thei ang.

Kumin PVL hmeichhe inelna lamah hian team paruk an inel a, a sang paliin semifinal an lut. An inkhelh kual vek hnuah Power Department Sporting Club chu vawi khat chauh an chak a, chak nei loin Durtlang an tla bawk.