PVL 2023 final khel tur TNT
Thutak Nunpuitu Team (TNT) chuan Tuichangral chu 3-1 (25-23, 18-25, 25-19, 25-20) a hnehin Tata SK 712 Pro Volleyball League final an lut, tualchhung volleyball inelna sang bera nomawi chawi turin match khat chak an la hmabak.
TNT hian an vawi thum nan final an lut a, tun hmain an la champion ngai lo. Nizan khan Chhinga Veng Sipkers leh Hunthar ten semifinal hnuhnung zawk an khel, a chak zawk leh Muanna Veng team hian final an khel dawn a ni.
Tuichangral lakah TNT thiampuipa Vanlalṭanchhana (Valbuanga) chuan point 24 a nei a, a team chakpuitu hi D3 Business Player of the Match-ah an thlang - mimal chawimawina hi tun season PVL match ruk a khelh tawhah vawi nga ngawt a dawng.
A boruak
Inkhelh ṭan hmain Tuichangral coach David Fanai chuan TNT hneh tur chuan vanneihna an mamawh tih Vanglaini a hrilh a, an intawn hmasaka an ngam loh an nih avangin a thusawi hi a mak hran lo, tun inelna neih laia ngam loh nei lo TNT boruak a hriat chian vang a ni tel bawk.
TNT assistant coach Lalzawmliana pawhin chak chiang sa an awm bik loh thu a sawi a, chesual thei an nih avangin an fimkhur a ngai takzet tih a sawi bawk - team pahnihin final luh an tumruh a, khelmual an luh hma aṭangin an fimkhur tih an ṭawngkamah a lang.
Inkhel en turin R. Dengṭhuama Indoor Stadium khat tlatin mipui an pungkhawm a, entu zingah kawr va ha chunga TNT ṭantute thawm a ring fal nalh, anni hi inkhel ṭan tirh aṭanga a tawp thlengin an zai tluan parh thei!
A hmuhnawm
Thutak Nunpuitu Team (TNT) lamin Vanlalṭanchhana (Valbuanga) chu an ṭan chhan a ni leh a, mahse a hlap hmasa ber chu line pawnah a chhuak daih. Set khatnaah an inbeitawk takzet a, mahse, 13-13 a nih hnuah TNT lamin point hnih hmu zawnin an kal fal.
Tuichang lamin a vawi khat nan 'time out' an la, an lo luh leh hnuah Vinod Khatkar chuan a vaw out hlauh a, hniam zawk lai nei tawh loin TNT lamin set khatna chu an la phawt, boruak nei lian zawk an nih avangin an dinhmun a ṭha nghal hle.
Mahse, David Fanai enkawl Tuichangral an tlawm ngawt bik lo. Set hnihnaah Valbuanga'n rawn hlap dik nghal pawp mah se Thangminlal hmangin an chhanglet a, a karlakah Saidingpuia Sailo leh Lalhmunmawia ten mawi zet zeta vaw thlain set an la let daih.
TNT nge nge
Set khat ve ve an lak theih avangin chak tur zawk rin thiam a harsa - Tuichangral khaw hrang hrang kalkhawmte thawm a ring a, court chhungah player an phur bawk; set thumna tir lamah pawh 7-3 lain hma an hruai fal nghal thei.
TNT setter Lalliankima (Makima) chu damkawr a nih avangin a chau, lakchhuah a ngai. Set hnihnaah an buai hnuah coach Lalhmangaihsanga Sailo chuan team rem khawm thar leh turin Makima aiah F. Lalrinngheta a dah lut a, set thumna bul erawh an ṭan fuh lo.
Mahse, zawimuanga insiamṭhain TNT hi a hniam zawk ni chungin an bei let a, Zosangzuala (Mama) chuan Vinod-a vuak lo danthlak sakin 10-10 a nih hnuah Valbuanga'n Lalchhanhima hlap a dang zui ve leh a, an lehpel - a tawp thengin an hawikir tawh lo.
A tawp boruak
TNT lamin Makima dah lut lehin a tira lut paruk hmangin an khel nawn, ball an vuak huai tawh bakah libero Lalramnghakdika chuan ball tla tur a chhan hnem malh malh - Mama'n a hui thlak hnuah chiang takin a hlap thla a, 19-14-in TNT an sang.
Tuichang lamin Saitea Sailo leh Vinod hmangin beiseina an nei thar leh a, an inkar tizim leh deuh mah se Valbuanga'n a zawna a hlap thlaksak bakah Haryana spiker Vinod-a hlap chu dansakin an beiseina an hmeh mitsak.
A tawpah TNT captain Vanlalchhantluanga Sailo chuan vuain, an khingpui lamin lo dang per mah se lak phak lohin a tla a. Hnehna lawmin TNT player an inkuah khawm a, mual sira anmahni ṭantute thawm a ring takzet bawk a ni.