Kuwait lakah India chak zo lo - a pawi thui thei!
SAFF Championship group stage-a an match hnuhnung berah India chuan 1-1 in Kuwait an inhnehtawkpui a, group hmahruaitu ni chunga semifinal luh an tumna chu a thamral.
Blue Tigers hian semifinal lut tho mah se group hmahruaitu an nih loh avangin semifinal-ah group B-a pakhatna Lebanon an hmachhawn a ṭul dawn a, Hero Intercontinental Cup final-a an hneh hnu ni mah se a awlsam lo ang.
India tan hian Sunil Chhetri chuan first half hun pek belhah goal hmahruai a khung a, Blue Tigers hian an chakpui mai dawn nia a lan hnuah Anwar Ali chuan hun pek belhah an lamah a tilut a, 1-1 in inkhel a tawp.
Chhetri = 92
Sree Kanteerava Stadium, Bengaluru-a inkhelah boruak a 'hot' takzet a, Blue Tigers tan Naorem Mahesh Singh a nung ṭha viau a, chance hlauhawm tia sawi theih nei hmasa zawk erawh Kuwait an ni.
Shabaib Al-Khaldi chuan crossbar chungah uiawm takin a thlawh a, Amrinder Singh chuan Mohammad Abdullah hun ṭha neih chu ṭha zetin a dansak bawk.
Sunil Chhetri erawhin a chance neih a hlah ve lo. 'Captain Fantastic' hminglem an pek striker hian Anirudh Thapa corner aṭanga ball kal chu tlu chungin, mawi zetin a pet goal a, India tan goal 92 a khungna chiah a ni. Chhetri chance neih hnuah Ashique Kuruniyan chuan chance duhawm a nei a, mahse, engmah lo maiah a chantir.
A pawi zo ta
Chawlhlawk hman zawh a nih hnuah India an fimkhur a, tlarhnung an veng tel. Heti chung hian Ashique-a'n chance a nei leh a, mahse, a chhawr lo nawn - Jeakson Singh tan pawh hming chherna hun a awm a, mahse, a chhawr lo.
A tawpah India an vanduai. Hun pek belh minute hnihnaah Abdullah Al-Bloushi-a cross satliah tak anga lang chu India centre back Anwar Ali chuan petchhuah tum mah se a pet fuh tawk lo a, India goal lamah a lut daih!
Hun a tawp zui a, 1-1 in an inhnehtawk - team pahnih hi an point hmuh zat a inang a, head-to-head ah an inhnehtawk a, goal difference a inang bawk. A tawpah goal khata khung tam zawk Kuwait hi group hmahruaitu an ni ta a ni.
A 'hot'
Bengaluru-a inkhel hi a 'hot' hle - India coach Igor Stimac chu a yellow card pahnihna a hmuh avangin hnawhchhuah a ni a, India forward Rahim Ali leh Kuwait defender Hamad Al Qallaf te chu an intihbuai avangin hnawhchhuah an ni bawk.
India tan Lallianzuala Chhangte chuan inkhel bul a ṭan a, Mumbai City forward chuan, "Lebanon aiin an ṭha zawk a, mahse, hneh thei kan nih laia kan hneh lo erawh a uiawm khawp mai," tiin Vanglaini a hrilh.
Lianzuala chuan inkhelh hmabak thlir nghalin, "Match hnih kan la neih hi a harsa dawn khawp mai. Ṭawngṭainaah min lo hre reng dawn nia," a ti a, match hnih a tih hian final khelh a beisei tihna a ni.
Lza & Ronaldo
India leh Kuwait inkhelh hmain Blue Tigers coach Igor Stimac-a'n Lallianzuala Chhangte a fak a, India tan chuan Cristiano Ronaldo ang mai a nih thu a sawi.
Croatian coach chuan, "Lianzuala hi a pawimawh takzet a, nakin zelah chuan Indian football-a player pawimawh ber a la ni hial ang. Professional football-a entawn atana ṭha a ni a, khawvel tana Ronaldo a entawn tlak ang hian India tan Lza hi a ṭhang zel ang," a ti.
Lianzuala chuan India coach-in a fakna chungchang hi sawiin, "A lawmawm rualin mawhphurhna sang tak a keng tel tih ka hria a, a aia nasa lehzuala player dang tana entawn tlak ni turin ka bei ang," tiin Vanglaini a hrilh.