Nu leh pa te fimkhur turin ka duh - Jeje

Indian football legend Jeje Lalpekhlua chuan Mizo nu leh pa te chu an fate football zinkawngah fimkhur taka ngaihtuahna seng tura a duh thu a sawi a, professional football zinkawng chu a awlsam loh thu a sawi.

Jeje chuan, "Tun hnaiah football academy indinthar an tam êm êm a, Mizoramin football kan tui tih hriain tam takin Mizoramah trial an rawn buatsaih ṭhin. Trial an buatsaih a, awlsam takin naupang an thlang a, an tlin vek tawh hnuah sum sen ngai an sawi leh chauh zel.

"Hetianga sum sen tur hi a tam êm êm ṭhin a, nu leh pa ten fate duhna tihhlawhtlin loh hreh siin, academy ṭha lem loah sum tam tak sengin fate a dah theih a ni," a ti a, academy chuan scholarship an pe thei a nih loh chuan indah loh mai chu a him zawka a hriat thu a sawi bawk.

Jeje chuan professinal player ni tura kawng zawh mek player-te pawh thu pawimawh chah nghalin, "Career ṭantirah hian football agent inti tam takin min dawr a, hei hi thutlukna siam fimkhur a ngaih hunlai tak a ni.

"Senior player zawk rawn hreh loh tur. Agent reng reng player hlawh aṭanga 5% aia tam phut chu an him lo," a ti a, player-te chu inveng fimkhur tur leh a hre zawk rawnna chang hre turin a chah.

India tan vawi 56 inlana goal 23 khungtu Jeje hian a khup hliam vangin kuminah inkhelh a chawlhsan thu a puang a, a football zinkawng ngaihnawm, politics a luhchilh chhan leh professional footballer nih tumte tana thu pawimawh tak tak hi 'John-a nen Khelmual Titi' programme-ah a sawi chhuak a, Jeje kawmna hi zanin dar 8:00 hian Zonet Zawlbuk & HD-ah pekchhuah a ni dawn a, Zonet YouTube member tan a en theih bawk ang.