Bayern-in €70m-in Kane lak an tum - a tlem mah mah!

German club ropui ber Bayern Munich chuan Harry Kane lakluh an duh a, England captain lei nana Tottenham Hotspurs an dawrna hmasa ber chu euro maktaduai 70 bakah a chet ṭhat dan a zira pawisa pek belh a ni. Bavarians ngamna zat hi a tlem mah mah a, Spurs-in an hnawl.

German chanchinbu Bild erawhin Bayern leh Kane te hian inremna an nei tawhin an ziak a, English striker mana an ngamna zat pawh hi an tisang dawn niin an ziak.

Tottenham-in Kane-a manah euro maktaduai 100 aia tam an beisei dawn a, Bayern hian striker ṭha hi an duh tak tak a nih chuan sum sen tam pawh an inhuam ngei a ṭul ang. Spurs striker hi Manchester United nen pawh sawizawm a ni a, chutihrualin Daniel Levy-a'n chelh a tum niin sawi a awm bawk.

Bayern mamawh Kane

German club hlawhtling ber Bayern Munich-in Thomas Tuchel hnuaiah Bundesliga nomawi an chawi a, amaehrawhchu Robert Lewandowski thlakna tur no. 9 ṭha an lakluh loh an tuar. Bayern hian champion turin vanneihna an mamawh a, match tawpna bera Borussia Dortmund chetsual zarah an champion hram.

Bavarians hian Lewy an neih chhung zawngin Bundesliga champion turin harsatna an tawk lo. Polish striker an neih hma hian a hun laia Germany striker ṭha bera chhal theih Mario Gomez an kawl a, a thlawp turin Croatian forward Mario Mandzukic an kawl bawk.

Forward pahnih hi player vantlang chunglam ve ve an ni a, chutihrualin khawvel striker ṭha berte an el phak loh deuh avangin kum 2011 leh 2022-a Borussia Dortmund laka Bundesliga nomawi an chan chhanah pawh a ngaih theih.

Season liam ta khan Bayern-in goal nawrna turin Jamal Musiala, Sadio Mané, Leroy Sane, Serge Gnabry leh Kingsley Coman te kawl mah se no. 9 rintlak an neih chu Eric Maxim Choupo-Moting a ni. Cameroonian striker Choupo-Moting hian season ṭha tak hmang mah se Lewy hmunruak a luah khat zo lo. Europe club lian dangten Bayern an hlauh leh theihna tur chu striker ṭha a ni a, Kane hi mamawh chhanna a ni ngei ang.

United tichaktu tur Kane

Manchester United-in an hmelma Manchester City elphak an duh a nih chuan Harry Kane hi an mamawh a ni a, Red Devils hian England captain hnaih phak forward pakhatmah an nei lo.

Erik Ten Hag-a hote hian City chauh an el dawn lo a; season liam taa an chunga awm Arsenal bakah Liverpool, Chelsea leh Newcastle United te chu an elpui tur a ni. United hian striker thawkrim satliah Wout Weghorst emaw inhliam ching Anthony Martial emaw hetiang tlukpui player chunga rinna an nghat a nih chuan Man City an inthlauhna zau tak hi a zim phah lo ang.

Man United ṭantuten nipui bazar ṭantirh aṭangin no. 9 ṭha mi an melh tura an ngaih laiin Ten Hag-a leh hoten Mason Mount aṭangin bul an ṭan. Mount hi United tan ṭhat theihna tur tam bawk mah se an mamawh ber niin a lang lo.

Kane hi Man United tichak thei tur player ni mah se Ten Hag-a leh a hoten thlirna dang an nei niin a lang. Chutihrualin Spurs hian Kane-a man hi an chhiar tam avangin Real Madrid pawh a inhnuk dawk a, Man United pawhin an tlin phak player-ah an ngai niin sawi a awm bawk.