Manchester City player thar Mateo Kovacic

Premier League, FA Cup leh Champions League nomawi chawitu Manchester City-in an captain Ilkay Gundogan chân mah se a hmun ruak luah turin Chelsea midfielder Mateo Kovacic an lalut nghal a, a man atan pound maktaduai 25 an seng.

Kum 29 mi midfielder hian City-ah kum li cham turin contract a ziak a, treble champion laiin nipui transfer-a player an lakluh hmasak ber a ni - a man pangngai bakah hian a khelh ṭhat dan a zirin City hian £5mtd chu Blues hnenah an pek belh ang.

Kovacic chuan, "Ka tan chuan thil lawmawm tak a ni a, City tana khelh hlan ka nghakhlel tawh hle a ni," tiin a sawi a, tun hnaia Chelsea dinhmun thlirin Croatian midfielder hi City a zawm thei hi a lawm tak takin a rinawm!

Nomawi chawi turin

Kovacic chuan, "Pep Guardiola enkawlna hnuaia City khel lai entu zawng zawng chuan an ṭhatzia inhmu vek ang. Ka tan chuan khawvela team ṭha ber an ni - chu chu an nomawi chawi zozai hian a tichiang a, football team ṭha ber an ni," a ti a, Pep-a City a dahsang hle.

Croatia international chuan sawi zawmin, "He squad zawm theih hi footballer zawng zawng mangphan chu a ni ngei ang. Zir tur leh hmasawnna tur ka la nei tih ka hria a, Pep-a enkawlna hnuaiah player ṭha zawk ka nih theih ka beisei. Chu chuan min tiphur hle a ni," a ti.

Kovacic chuan sawi zawmin, "Tunah chuan season thar atana inpuahchuah tura Manchester khawpui ka rawn pan hmain rei lotê ka chawl hahdam ang. He club hi a chung bera awm tir reng a, nomawi chawi belh turin ka lokal dawn a ni," a ti a, Etihad Stadium-ah hlawhtlinna chhar belh a inbeisei.

Sulhnu

Croatia tan vawi 95 inlana goal nga khungtu Kovacic hian an ram club Dinamo Zagreb aṭanga a professional zinkawng zawh ṭanin, January 2013 khan Inter Milan a pan - Serie A club tan season hnih leh a chanve khelin, kum 2015 khan Real Madrid a pan.

Real tan season thum a khel a, season tinin Champions League nomawi a chawi vek - La Liga (1), Spanish Super Cup (1), UEFA Super Cup (2) leh FIFA Club World Cup (2)-ah te a champion pui a, kum 2018 khan loan-in Chelsea a zawm.

London club hi season khat hnuah a nghetin a zawm a, season nga a khelh chhunga match 221 inlansakin goal ruk a khung a, assist vawi 15 a nei - Champions League, Europa League, UEFA Super Cup leh FIFA Club World Cup-ah te champion nomawi a chawipui.

Mamawh chhanna

City director of football Txiki Begiristain chuan, "City-a Kovacic lalut tura thutlukna siam hi thil harsa lo tak a ni a, a chhan chu tactical leh technical taka a thil neih hi midfielder-a kan zawn mek a nih vang a ni," a ti.

Begiristain chuan tun hnai maia thutlukna siam an nih loh thu sawiin, "Rei tak chhung chu Kovacic hi kan lo en thla tawh a, a khel kan en apiangin lungsi takin kan thlir ṭhin a ni," a ti a, an player duhtak an lakluh thu a sawi.

World Cup 2022-a Croatia match zawng zawnga inlan kim vek Kovacic hi kum 2021-a Chelsea-in Champions League final-a City an hneh ṭum khan a inlan a, bench aṭanga luhtir a ni - tunah chuan City kawr hain a inlan dawn ta.