A vawi ruk nana World Cup khel tur Marta

Brazil forward Marta chuan a vawi ruk nan World Cup a khel dawn - kum 37 mi hmeichhe footballer hi tun nipuia hmeichhe World Cup khelh tura Brazil squad-ah telh a ni a, a vawi ruk nan World Cup-ah ram aiawhin a inlan dawn tihna a ni.

Kum 37 mi Marta hi FIFA World Player of the Year-ah pawh ṭum ruk ngawt thlan a lo ni tawh a, World Cup-ah goal 17 khung tawhin, mipa leh hmeichhe World Cup pawh huap vekin World Cup-a goal khung hnem ber record a chelh mek.

Brazil manager Pia Sundhage chuan, "Marta hi kan tan chuan Lalnu ang mai a ni a, kan zah rawn a ni. A bula awm ringawt pawh inchhuanna tham a ni a, inkhel bul a ṭan ṭhin dawn em, ka la sawi thei lo. Ti tura ka tih chu a ti mai ang a, ṭha takin a hlen ang tih ka ring bawk," a ti - Marta hian Brazil tan match 174-ah goal 115 a khung tawh.

Hmeichhe World Cup hi July 20-ah khelh ṭan tur niin, Australia leh New Zealand te chuan an inthlen ṭawm dawn - July 20, chawhnu dar 12:30-ah New Zealand leh Norway inkhelin, bul an ṭan ang a, July 20, tlai dar 3:30-ah Australia leh Republic of Ireland an inkhel bawk ang.

Mipa World Cup lama champion ngun ber Brazil hi hmeichhe World Cup-ah mak takin an la champion miah lo a, group F-ah France, Jamaica leh Panama te nen an awm ho dawn a ni.

Brazil Squad:

Goalkeepers: Leticia Izidoro (Corinthians), Camila (Santos), Barbara (Flamengo).

Defenders: Rafaelle (Arsenal), Bruninha (Gotham FC), Kathellen (Real Madrid), Antonia (Levante), Tamires (Corinthians), Lauren,

Monica (both Madrid CFF).

Midfielders: Adriana (Orlando Pride), Ary Borges (Racing Louisville), Kerolin (North Carolina Courage), Ana Vitória (Benfica), Duda Sampaio, Luana (both Corinthians).

Forwards: Debinha

(Kansas City Current), Andressa Alves (Roma), Nycole (Benfica), Gabi Nunes (Madrid CFF), Geyse (Barcelona), Bia Zaneratto (Palmeiras), Marta (Orlando Pride).