Arsenal leh Rice an inhnaih

Premier League champion tum Arsenal chuan champion lai Manchester City nena an inchuh lai Declan Rice chu an chang zawk dawn niin a lang ta, nimin tlai khan Man City hi North London club ngamna zatin an ngam lo niin khawthlang chanchinbute chuan an tarlang.

West Ham captain Rice hian season khat daih chauh contract a nei tawh a, tun nipui bazar hi man to taka a chhuah theih hun a ni. Club lian tam takin an hnena khel turin an duh a, chung zingah chuan Arsenal hi a chuh na ber an ni mek.

Mikel Arteta enkawl Gunners hian Rice lei tumin vawi thum an dawr tawh, an dawrna hmasa pahnih chu hnawlsak an ni. An dawrna hnuhnung ber erawh nimin tlai khan Hammers nen an sawi ho mek a, thutlukna erawh kan hre hman lo.

Arsenal dawrna hnuhnung ber hi a belhkhawm chuan pound maktaduai 105 a tling. Man City chuan hetiang zat emaw a aia tam emawa dawr an tum tawh rih lo niin Italian journalist Fabrizio Romano chuan a tarlang.

British player man to ber chu Jack Grealish a ni mek - Aston Villa aṭanga Manchester City a zawm khan Grealish hi pound maktaduai 100 man a ni a, tuna Rice lei tura Arsenal sum thehchhuah nen a inzat, pound maktaduai nga dang hi a pun belh leh theihna tur a ni.

Arsenal leh Man City ten Rice lei an dilna hmasa hi pound maktaduai 90 a ni a, a man pek an tum dan erawh a inang lo. Tuna indawrna hnuhnung ber pound maktaduai 105 chungchanga an la inrem lohna chu a man inpek tlak dan tur chungchang niin a lang.

Sky Sports tarlan dan chuan pound maktaduai 105 hi chu buaina a ni lo, buaina chu a man inpek dan tur a ni zawk. Hammers hian a hma leh rang thei ang bera pawisa hi dawn kim an duh - player leh club chungchangah erawh harsatna a awm lo.

Arteta naute hian season hmasa khan Premier League nomawi an chawi teuh hle a, mahse season tawp dawnah an zuih. English football inelna sang berah hian champion ngei an tum a, nomawi chawi tur chuan sum hman a ngai tih pawh an hrechiang.

Chelsea aṭangin Kai Havertz an la dawn tih a chiang tawh a, Germany international la chhuak turin pound maktaduai 65 an hmang. Havertz bakah hian Ajax aṭangin defender Jurrien Timber lak tumin an hel mek a, kum 22 mi Timber lak tum pawhin sum an thehchhuah nual a ngai ang.