National referee thar Lalthansangi

AIFF Referee Committee-in referee category 2 a tih chhuah tharah Bilkhawhthlir nula Lalthansangi a tling. Mizoramin National Referee (active) pali a nei ta chiah a, Thansangi hma hian F. Zohmingliani (Nutei), Jim Zaithantluangi leh Lalhruaizeli Khiangte (Nupuii) te an lo tling tawh bawk.

National Referee tur hian Fitness,Theory leh Practical-te paltlang a ngai a, India ram hmun hrang hrangah Test hi neih a ni. Thla tharah hian Kochi-ah FIFA MA Course neih a ni dawn a, hmeichhe referee pathum Nutei, Nupuii leh Thansangi te an ko.

Mizoram Football Association-in referee ṭha neih tumin nasa takin hma an la a, national referee pali neih hi hmasawnna a ni a, chutihrualin hmasawnna tur a la tam hle. Tun dinhmunah Mizoram mipa active national referee pakhat chauh a awm a, tun hmain Mizo pathum Laldika, Jonathan Lalngaihawma leh Lalfakzuala te national referee tur hian a inziak tling tawh bawk a ni.