India-in Pakistan an mikhual dawn

2023 ICC World Cup-ah India-in kumin October 15, Pathianni hian Ahmedabad-ah Pakistan a mikhual dawn - mi 1,32,000 lenna stadium Narendra Modi Stadium meuh pawh ticket a zo rang khawp ang.

Cricket inelna ngaihhlut World Cup (ODI) hi a vawi 13-na tur a ni a, October 5 - November 19, 2023 chhunga khelh tur inlena hi India-in a thleng dawn a ni.

Ram inhal

India leh Pakistan a nih tawh chuan eng inelna pawh ni se a boruak a 'hot' ṭhin a, cricket a nih chuan boruak a sang lehzual. Hotstar-ah hian Premier League inkhel lian thamin entu nuai hnih khat chauh a neih laiin cricket-a India inkhel chuan nuai 50 a hawlh thei zel a, nikum T20 World Cup-a India leh Pakistan inkhelh ṭum khan nuai 100 chuangin an in an en. Hemi let fe hi TV kaltlanga entu an la ni.

Ram pahnih hi an inhal avangin international match a nih loh chuan a intum tawh ngai meuh lo. India-in Pakistan an thlawh hnuhnun ber chu kum 2008 kha niin Asia Cup (50 overs) khel turin an zin.

Pakistan erawhin kum 2012 khan T20 match khel turin India hi an tlawh a, 1-1 in series-ah an inhnehtawk. Kum 2016 khan India-in Asia Cup (T20) an thleng a, Men in Blue hian group stage leh Super 10-ah Shaheens hi an hneh ve ve.

Shaheens hian India tlawh hi an hreh a, an batter ropui Javed Miandad chuan, "Pakistan-in kum 2012 leh 2016 khan India kan tlawh. ICC ODI World Cup pawh ni se, Pakistan-in India an tlawh dawn a nih chuan BCCI-in kan ram rawn tlawh ve phawt hi an intiam hmasak a ngai," ti hialin tun thla tir khan a sawi.

A chiang ta

Pakistan hian India ram zin duh loh vangin World Cup boycott hial sawi ri mah se tunah erawh thutlukna an siam fel a, India ram an tlawh dawn ringawt a ni lo - an inhmachhawn dawn. Ocober 15 hian Ahmedabad-ah an inkhel ang.

India hian World Cup hi khawpui 10 - Ahmedabad, Bengaluru, Chennai, Delhi, Dharamshala, Hyderabad, Kolkata, Lucknow, Mumbai leh Pune ah te khelh a ni dawn. Inelna hmachhawn tur hian ram pariat Afghanistan, Australia, Bangladesh, England, India, New Zealand, Pakistan leh South Africa te an tling tawh.

Tunah hian Zimbabwe-ah ram paruk Sri Lanka, Zimbabwe, Scotland, Netherlands, West Indies leh Oman ten hmunruak pahnih an inchuh mek. World Cup khel tur zawnna hi July 9 hian khelh zawh a ni dawn a, cricket ram ropui tia sawi ṭhin West Indies meuh pawh inkhel lo thei dinhmunah an ding a ni.