Tottenham keeper thar Vicario

Premier League club Tottenham Hotspur chuan Serie A club Empoli aṭangin goalkeeper Guglielmo Vicario an lalut a, a man zat atan hian pound maktaduai 17.2 vel an inseng nia tarlan a ni.

Kum 26 mi Vicario hian Spurs-ah hian kum nga chhung khel turin contract a ziak a, manager thar Ange Postecoglou hnuaia player an lakluh pahnihna a ni - Vicario hma hian loan-a an hawh reng ṭhin Sweden midfielder Dejan Kulusevski chu a nghetin an lo lalut tawh bawk.

Spurs chuan, "Keeper ṭha tak, tlarhnung aṭanga game siam thei keeper a ni," tiin an keeper thar chu an fak - Udinese aṭanga inzir chhuak keeper hian Serie D thlenga khel tawhin Fontanafredda, Venezia, Perugia leh Cagliari-ah te a lo khel tawh.

Serie A-a a match hmasa ber chu 2020-21 season khan khel ve chauhin, hetihlai hian Cagliari tan a khel a, season tluanin league match li a khel ve. Mahse, 2021 khan Empoli chu loan-a zawmin, season hmasa khan a nghetin a pan a, season hnih a khelh chhunga match 71 inlansakin a hming a chher hle.

Vicario hian season hman zawh takah khan league match 31 inlanin, goal 39 chiah a chhuah a, vawi sarih clean sheet a nei thei - season ṭantira relegation hmachhawn tura beisei Empoli chu 14-na nihpuiin, point 12 zetin relegation zone an hlat a ni.

September khan Italy squad-ah a vawi khat nan koh a ni a, mahse, Eurpopean Championship qualifying-a England an hmachhawnna inkhelah bench-ah a awm tluan - Albania leh Australia an hmachhawnte, Nations League semifinal zingkawngah te squad-ah a awm ve zel.

Spurs first choice keeper Hugo Lloris hian London club-ah thla 12 chiah contract a nei tawh a, kum 36 mi a nih tawh avangin chhuak mai tur anga sawi thawm a ri ring hle.

Hetihlai hian kum 35 mi keeper Fraser Forster chu Spurs-ah hian a awm mek bawk.