Italian FA-in number 88 hak phal lo

Italy rama football thuneitu sang ber Italian Football Association (FIGC) chuan anti-Semitism (Juda hnam hmuhsitna) an duhlohzia lantir nan jersey number 88 hak an khap dawn a, hemi chungchangah hian Italy sorkar aiawh leh FIGC president Gabriele Gravina te chuan inremna an ziak a ni.

Number 88 hi German Nazi slogan nen sawizawm theih a ni a, hemi a nih avang hian number 88 hi hak loh turin thutlukna hi siam a ni ta a ni. Sorkar leh Italian FA inremna ang chuan Juda hnam tihelna ang chi au hla a awm chuan inkhel tihtawp theih a ni ang.

Italy interior minister Matteo Piantedosi chuan, "Kan stadium-a thil la thleng reng duhawm lo tak tak do nana hmalakna ṭha tak a ni a, anti-semitism hi na takin kan do zel dawn a, chi inthliarna, hnam tlem zawk beihna leh mihring indiriamna thleng chi reng reng chu kan bei zel dawn.

"Hei hi kan hmalakna hmahruai chauh a ni a, infiamna khawvela chi inthliarna leh inhmuhsitna reng reng chu nuai bo turin theihtawp kan chhuah zel dawn," a ti.

March thla khan Lazio fan pakhat chuan AS Roma an hnehna inkhelah number 88 chuanna jersey a ha a, fans dang pahnih chu anti-Semitic tihlanna thilah an inrawlh bawk - Lazio chuan an fans pathumte hi Lazio khelmual Stadio Olimpico-a damchhunga lut thei tawh lo turin an hrem.