Grass atan Swiatek a inpeih

Hmeichhe tennis world number 1 Iga Swiatek chuan grass court turnament khelh a chak tawh tih a sawi a, season dangah harsa ti deuh ṭhin mah se kumin chu a inringtawk ve hle tih a sawi chhuak.

Wimbledon inbuatsaihna Bad Homburg Open-ah Swiatek hi a inlan a, a match hmasa berah set khatna hloh nghal mah se world number 58 Tatjana Maria chu 5-7, 6-2, 6-0 in a hneh.

Grend Slam vawi li champion tawh Swiatek chuan, "Ka khelh danah ka lawm khawp mai, player ṭha leh tawhkhirh tak laka ka thawh chhuah leh theih dan kha min ti lawm zualtu pawh a ni.

"Grass hi ka tana hmun nuam leh ṭha ber a ni ngai lem lo. chutihrualin kumina ka match hmasa ber kha en chuan beisei ka nei ve thei turah ka ngai," a ti a, thil awlsam tak erawh a ni dawn lo tih a sawi bawk.

Polish nula Swiatek-i'n Wimbledon a khelh ṭhat ber ṭum chu 2021 kha niin fourth round a thleng, kuminah hian a thlen chin aṭanga hmasawn ngei a tum ang, chumi tur chuan inbuatsaihna a neih ṭhat hmasak a pawimawh.

Inkhel dangah seeded pangana Bianca Andreescu chuan set thum an khelh hnuin Brit Sonay Kartal a hneh a, seeded pasarihna Elisabetta Cocciaretto erawh Czech Republic nula Katerina Siniakova lakah a chak lo thung.