NFL quarterback hlui tuiah a tla hlum

NFL quarterback hlui Ryan Mallett chu June 27, Thawhlehni khan tuiah a tla hlum. Kum 35 mi Mallet hi New England Patriots, Houston Texans leh Baltimore Ravens tan te a khel tawh a, Florida-ah a bialnu nena chawlh an hmannaah a chesual a ni.

Mallet hi 2011 NFL draft-ah khan third round pick a ni pha a, kum 2011-13 chhung khan Patriots-ah NFL legend Tom Brady thachhang dawltu a ni. 2017-18 season zawh khan Mallet hian inkhelh a chawlhsan. An khua Arkansas-a White Hall High School football team coaching staff a zawm a, February 23, 2022 khan head coach-ah an hlangkai.

Okaloosa County Sheriff thuchhuahin a tarlan danin Mallet hi tuipui kam hnaiha tuia chesual zingah a tel. Lifeguard-in tui aṭanga a lakchhuah hian a tho tawh lo a, theihtawp chhuahin chhan tum mah se an chhan hman ta lo.

Tom Brady chuan Mallet nena an lak dunna thlalak IG-ah a pholang a, NFL legend chuan, "Pa ropui kan chan. I chhungte leh i hmangaihte tan kan ṭawngṭai e," tiin a ziak tel bawk.

Mallet hian NFL game 21 a khel a, 1,835 yards vawmin touchdown vawi kua a vawm bawk.