Postecoglou hnuaiah Mason leh Jedinak

Tottenham Hotspur chuan manager Ange Postecoglou thachhang dawl turin Ryan Mason leh Crystal Palace midfielder hlui Mile Jedinak te an awm tur thu an tichiang.

Mason leh Jedinak te hian assistant coach hna an chelh dawn a, senior assistant coach hna chelh tur chu Chris Davies a ni ang. Davies hi Swansea City, Liverpool, Celtic leh Leicester City coaching staff-ah a tel tawh a ni.

English manager Mason hi Spurs coaching staff-ah kum 2018 khan a awm ṭan a, kum 2021-a Jose Mourinho an ban khan manager lailawk atan an ruat. Kum 32 mi Mason hi Antonio Conte hnuaiah pawh khan a awm leh a, Conte leh Cristian Stellini te an chhuah khan manager hna hi a lo chelh leh bawk.

Kum 38 mi Jedinak erawh Postecoglou hnuaiah Australia captain a ni ṭhin a, inkhelh a chawlhsan hnuin Aston Villa-ah youth coach leh loan development coach hna a chelh.

Tun thla tir khan Spurs-in Postecoglou hi manager atan an lalut a, kum li daih contract a ziak. Kum 57 mi Postecoglou hian Spurs a zawm hma hian kum hnih chhung hlawhtling takin Celtic a enkawl a ni.