PVL hmeichhe champion Luangmual
Luangmual chu Tata SK 712 Pro Volleyball League an khelhna hmasa berah an champion nghal. Ningani zan final hmuhnawmah Luangmual hian an khingpui Kanan chu 3-0 (25-21, 25-12, 25-17) in an hneh.
PVL 2023 an khelh tirh aṭangin Luangmual hian harsatna an tawk lo, league round-ah chak kim vek chungin semifinal an lut. Final-a an hneh tak Kanan ngei pawh an hneh tawh a ni a, an phu ang ngeia nomawi an chawi hi a mak lo.
Luangmual chungnung
R. Dengṭhuama Indoor Stadium, Mualpuiah a tir aṭangin Luangmual an chungnung a, hnufual lai nei lem lo leh harsatna lian tak tawk loin tualchhung inelna lian berah an hlawhtling, an champion theih nan Nipa Barad a thawhhlawk hle.
Luangmual hi Pro Division kai thar chauh an ni a, tun season bul ṭanna MVA Cup-ah final thleng mah se Kanan an ngam lo. Pro Volleyball League-ah erawh hlawhtlin ngei tumin an che chhuak - state pawn aṭanga player lalut awmchhun an ni.
Gujarat tleirawl Nipa Barad hi an chakna hnar pawimawh a ni ṭhin a, final bikah pawh point 30 ngawt hlap chhuakin D3 Business Player of the Match atan thlan a ni a, a pawimawhzia hrilhfiahna chu KT Enterprise Best Spiker atana thlan a ni kha a ni bawk.
An hmuhnawm
Spikers an langsar ṭhin, point hlap chhuaktu an nih avangin an langsar hi a mak lo. Chutihrualin, an hlap tur ball siamsaktu setter an pawimawh. Luangmual tan setter F. Lallianchhungi chu a hmuhnawm tluan chhuak zak.
Chhungi hian Barad-i tan ball a vawrh hnem a, Gujarat tleirawl bakah Lalmuanpuii, Hmingṭhazuali leh R. Malsawmtluangi te tan a siamsak ṭha thei hle a, a phu ang ngeiin KT Enterprise Best Setter chawimawina a dawng.
Luangmual sum sen a thlawn lo. Tualchhung volleyball inelna hmeichhe huang bikah Power Department Sporting Club, Durtlang leh Bethlehem Vengthlang te hnungzuiin champion thei palina an ni.
Volleyball hmasawn nan kan bei zel ang - Dr. Mala
Tata SK 712 Pro Volleyball League hmeichhe final khelh zan hian khuallian Dr. Lalmalsawma Nghaka chuan tualchhung volleyball-in hma a sawn zel chu an duhthusam a ni tih a sawi a, sum leh pai sen a ngai a nih pawhin an tlanchhiat loh tur thu a sawi.
Volleyball Federation of India Vice President bakah Mizoram Volleyball Association President ni bawk Dr. Mala chuan, "National leh international thlenga Mizo player-te an tel theih hi Mizoram Volleyball chuan a duh a. Kan hruaitute nen kan inrawn tlang ang a, international-a tawnhriat nei tawhte chah lutin, player, referee leh coach-ten training ṭha an neih theihna tur buatsaih dan kawng kan zawng dawn a, senso ka tum vek ang.
"Season thar lo awm turah hian Mizoram volleyball calendar-a awm sa angin September thla chho velah Inter Village Tournament buatsaih turin ruahmanna a awm a, lo inring lawk turin khua leh veng hrang hrang ka sawm che u a ni," a ti.