SAFF Semifinal: Lebanon leh India an intawng nawn dawn
Hero Intercontinental Cup final-ah India-in 2-0 in Lebanon an hneh a, he inkhelah hian Mizo tlangval Lallianzuala Chhangte chuan goal a khung bakah Sunil Chhetri khung tur a siamsak.
India-in champion nomawi an chawi theih nan Mizo tlangvalin a thawhhlawk a, hero of the match atan thlan a ni hial. Zanin dar 7:30 a ri ang a, SAFF Championship semifinal-ah India leh Lebanon an intawng ang a, Indian football fan-ten Lianzuala lam bawk an hawi leh ang.
Lebanon tan India hneh lo nawna haw hi a zahthlak dawn - Bengaluru khawpuiah phuba lak châknain an khat ang tih a chiang a, inkhel a hmuhnawm loh ring suh.
Vawiin tlai dar 3:30 hian semifinal hmasa zawk khelh a ni dawn a, group stage match tawp bera India nena 1-1 a inhnehtawk Kuwait leh Bangladesh te an inhmachhawn dawn.
Chak tum India
India forward Lallianzuala chuan, "Kan inbuatsaihna a ṭha a, hneh leh ngei kan tum. Chutihrual chuan anni pawh hian min hneh an châk tawh dawn a, kan intawn hmasaka an chak loh hlim pawh khan inkhelh lehnghal an châk hial," tiin Vanglaini a hrilh.
SAFF-a champion lai chu India an ni a, nomawi pariat zet chawi tawhin champion ngun ber an ni bawk. Mahse, hei vang ringawt hian Blue Tigers-in SAFF an ngaihhlut loh phah lo a, zaninah pawh chak ngei an duh.
Lianzuala chuan, "Ka inkhel a nih phawt chuan, a ṭha thei ang bera khel chhuak turin ka bei ang. Tun dinhmunah India tan champion theihna a vang a, chuvang chuan champion chance kan neihnaah hi chuan theihtawp chhuah kan duh," a ti.
India leh Lebanon hi vawi riat an intawng tawh a, India-in vawi hnih hnehna changin Lebanon hi vawi thum an chak a, vawi thum an in draw - a lawmawm lai chu an intawn hnuhnung pahnihah India an tlawm lo.
Beiseina
Blue Tigers tan captain Sunil Chhetri chu innghahna langsar a ni leh dawn. Bengaluru striker hian tun inelnaah goal nga a khung tawh a, ram tan match 140-ah goal 82 a khung tawh bawk!
Lebanon lam pawhin Chhetri ven dan tur an inhrilh uluk viauin a rinawm a, an intawn hmasaka an ngam loh Lianzuala pawh dah ṭhat an tum ang - mahse, a awlsam dawn lo tih a chiang a, FIFA ranking chhuak thar bera top 100 luahtu India hneh hi hna awlsam a ni dawn lo.
Lebanon coach Aleksandar Ilic chuan, "India hmachhawn a hautak dawn. He team hian hna ṭha tak an thawh avangin kan zah êm êm. Tun hnaiah vawi hnih kan intawng tawh a, kan level chu a inang deuh rengin ka hria.
"Thil hotêin danglamna chu a thlen thei ang," a ti a, a thusawi pawm loh a harsa - Blue Tigers tan fimkhur a ṭul a, chetsual zeuhin team pahnih result thui takin a hril thei ang.