Kawr pawl phelha kawr sen ha tur Mount

England midfielder Mason Mount chungchangah June 29, Ningani khan Manchester United leh Chelsea an inrem. Red Devils hian Mount manah Blues hi pound maktaduai 55 an pe ang a, a chet ṭhat dan a zirin pound maktaduai nga an pek belh leh ang. Mount hian kum nga daih contract a ziak dawn a, June 2028 thleng Old Trafford-ah a châm dawn.

Mount hi tun nipui transfer-a Erik Ten Hag-a player lakluh hmasak ber a ni a, Champions League khel tur Man United hian player dang pawh an la lak belh dawn. Chelsea erawh season liam taa pound maktaduai 600 zet an sen avangin Financial Fair Play an bawhchhiat loh nan June 30 (nimin) hmaa a tam thei ang ber an hralh hi a pawimawh a ni.

An indawr dan

Man United leh Chelsea inrem hma hian London club-in United dilna ṭum thum an hnawl. Blues hian anmahni chhul chhuak Mount hi chhuah an duh lo a, amaherawhchu nakkuma contract tawp mai tur Mount hi contract thar an ziahpui theih loh avangin thutlukna harsa hi an siam a ṭul phah ta a ni.

Kar hnih liam ta khan Man United hian Mount hi pound maktaduai 40-in an dawr a, Chelsea hian pound maktaduai 70 vel an beisei thung. Man United-in ṭum hnih an dawrnaah hian pound maktaduai 45-50 vel thehchhuah an inhuam a, pound maktaduai nga pek belh a tel bawk.

Chelsea phalna zat a nih loh avangin Man United-in a ṭum thum nan an dawr leh a, pound maktaduai 50 bakah a chet ṭhat dan a zirin pound maktaduai nga belh an inhuam. Mahse, Blues-in an la phal chuang lo, pound maktaduai 58 bakah a chet ṭhat dan a zira pound maktaduai sarih pek belh an la duh.

Mount-a'n chhuah a duh a, Man United-in an duh miau avangin a tawpah an inrem. Man United hian pound maktaduai 55 an pe dawn a, pound maktaduai nga dang erawh awlsam taka thehchhuah tur a ni lo. Mount a chet ṭhat ve viau a ṭul dawn a ni.

United mamawh?

Manchester United mamawh ber nia lang chu striker a ni a, Erik Ten Hag-a lei hmasak ber erawh Mount a ni. Midfield hi United chakna lai niin a lang a, chutihrualin Mount hi chhawr theihna tur a tam.

Mount hi striker hnunga position pathumah a awm thei vek a, helai position-ah hian Bruno Fernandes, Alejandro Garnacho, Jadon Sancho, Antony leh Christian Eriksen te an awm. Mount ang thoin Marcus Rashford pawh position pathumah hian a khel thei vek.

Chutihrualin Bayern Munich-ah Marcel Sabitzer a kir avangin Mount hi Eriksen-a elpui tur a ni thei bawk. Mount hi a naupang zawk a, Danish midfielder ai hian goal venhim kawngah a ṭangkai dawn.

Season liam ta thlir chuan tlarhnung pui kawngah Eriksen a khawng tawk lo fo a, Mount hian United tlarhnung a pui thei ang. Hei bakah hia squad tihchhahna ṭha tak a ni thei ang. Ten Hag-a awm hmaa United midfield innghahna McFred (Scott McTominay leh Fred) te aiin Mount hi a ṭha zawkah a ngaih theih a, United mamawh ber a nih loh pawhin an ṭhatpui khawp ang.