Wimbledon 2023: En teh, a lo her chhuak leh dawn ta

Tennis tournament lian leh ngaihhlut Wimbledon an khel leh dawn hnai ta - July 3, Thawhṭanni aṭangin tennis ngainatute chuan All England Club, London lam an hawi leh ṭhup tawh mai dawn a ni.

Season khat chhungin Grand Slam pali - Australian Open, French Open, Wimbledon leh US Open an khel ṭhin, heng major tournament-te hlutna hi a inang, an ranking point ken tel zat pawh a inang zel.

Mahse, kum 1877 aṭanga khelh ṭan Wimbledon hi tennis tournament upa ber a ni a, lawmman sum fai tam berna hmun ni lo mah se ngaihhlut a hlawh ṭhin a, player ten thuamhnaw var vek an hak ṭhinte chu an chin dan danglam a ni.

Hnam fing leh hausa hmasa British sorkarin khawvel ram hrang hrang a awp hnem ṭhin a, an awp beh ramte hnenah an ropuina hi thuk takin an tuh ṭhin, media tuallaia an chak bawk avangin Mizote pawhin Wimbledon hi kan hrechiangin kan ngaihlu bawk.

Roger leh Rafa

Wimbledon sawi rualin rilruah Roger Federer a lo lang ṭhin, 'Darling of Center Court' an tih mai ṭhin, British mipuiten an ngainat leh ṭan êm êm hi kuminah chuan a hmel kan hmu dawn tawh lo.

Swiss star hian Wimbledon title hi vaw riat ngawt a la a, a champion hnem bakah a nungchang leh grass court ngeia a inkhel hmuhnawm bikte chu mipui mit titlaitu a ni ṭhin, champion hnem lamah ṭhangtharten an rawn khum a nih pawhin Federer leh Wimbledon inzawmna chu an rawn khum a rinawm tawh loh a ni.

Federer sawi rualin rilruah Rafael Nadal a lo lang bawk ṭhin. Spanish star hian hliam vangin Wimbledon 2023 hi a khel thei dawn bik lo, vawi hnih a champion tawhna hmun a nih avangin Nadal pawhin sulhnu a nei ṭha viau.

Player ropui pahnih intawn tawhna zingah chuan 2008 Wimbledon final kha sawi lan a ni ṭhin. Darkar li leh minute 48 an inkhelh hnuah Nadal zawk 6–4, 6–4, 6–7(5–7), 6–7(8–10), 9–7 in a chak a nih kha.

Player mala ropui an awm fo a, an la awm zel bawk ang. Federer leh Nadal anga tennis inelna boruak lian siam a, inel ngaihnawm leh ropui bik erawh an chhuak rual tawh kherin a rinawm loh.

Champion lai Djokovic

Roger Federer leh Rafael Nadal ropuizia inhrilh nawn a ngai lo, mahse, hetah hian tennis hi a la tawp mai lo - anni pahnih aia Grand Slam champion hnem a awm, a hming chu Novak Djokovic a ni.

Serbian star hi player ṭha pahnih hunah a hun a rawn inherchhuak ve a, kum naupang ber a ni. A hun hmasa lamah chuan tharum a ngah tawk lo a, a rilru a paukhauh tawk lo deuh niin an sawi ṭhin tawh, a tir lamah a U te pahnih hi a el phak meuh lo.

Mahse, pa luhlul leh mahni thu duh a nihna chu a puitlin tak tak hnuah a lang a, a thiamna a ril bakah ngelnghet taka a khelh reng theihna chuan rah ṭha a chhuah - French Open 2023 an khelh zawh meuh chuan Grand Slam champion hnem ber a ni der tawh.

Wimbledon title pawh pasarih zet a la tawh a, kuminah hian a champion thei a nih chuan Federer-a title lak zat a nih rual der dawn tihna a ni, a sulhnu leh thlen chin hi a nep lo rem rem hle.

Grass court bikah Djokovic-a'n match 86 chhung hnehna a chang tawh, tuna player inkhel lai - ranking sang zual 20 zinga amah ni lo player dang 19 te grass bika an chak zat belhkhawm aiin match khatin a tam zawk!

Number 1 Alcaraz

Zep tur a awm lo a, a dam ṭha a nih phawt chuan Novak Djokovic hi tunlai player dangte nena khaikhin chi pawh a ni lo. Chutihrualin, season hmasa aṭang khan Carlos Alcaraz a rawn inlar, ani hi ranking thlenga rawn thlaksak theitu a ni.

Spanish tlangval Alcaraz hian season hmasa khan US Open nomawi a chawi a, world number 1 a ni zui bawk. Mahse, New York khawpuia a hlawhtlin hnuah hian thla li chhung a inkhel thei lo, hei hian a ranking a tihniam leh hlauh.

Australian Open a khel thei lo a, a inkelh thiamna clay court inelna lian French Open semifinal-ah Djokovic a ngam lo, a ruh a la no deuh mah mah emaw ni tih tur a ni, grass court hi a inkhelh thiam lohna a la ni zui.

Amaherawhchu, Wimbledon inbuatsaihna zinga an dah san leh ngaihhlut Queen's Club Tennis Championship-ah Alcaraz hi a rawn champion nawlh, nomawi a lak bakah world number 1 nihna a la let nghal bawk.

Seeded pakhatna ni chungin Wimbledon a khel dawn a, grass-ah a inkhel thei viau tih a taka a lantir bawk avangin All England Club-ah pawh mipui mit fukna a ni dawn, final hma chuan Djokovic nen an intum thei dawn lo a ni.

Hmeichhe lam

Justine Henin a chawl hma a, player ropui bik Serena Williams pawh a hun a liam tawh. Mi bik zinga mi Ashleigh Barty a rawn chhuak a, sulhnu ropui tak hnutchhiah thei tura ngaih a ni - Grand Slam champion pawh a harsat lo.

Mahse, Australian nula hi kum 25 mi lek niin a chawl thut a, a chawlh thu a puan lai hian world number 1 a ni hial. Barty hnuah Iga Swiatek a rawn lang, Polish nula hian number 1 nihna a chhawm, tun thlengin a la thlauh thla lo a ni.

Kum 24 mi Swiatek hian French Open nomawi pathum bakah US Open title a la tawh, grass hi a tan hmun ṭha a ni hran lo - Wimbledon bikah phei chuan kum 2021-a fourth round a thlen kha a tawn san ber ṭum a ni hial.

Ranking chhut chuan Swiatek hi rinkai a ni a, mahse grass court tournament a nih miau avangin dah san a harsa rih. Champion lai Elena Rybakina chu mipui mit fukna a ni dawn tih a chiang.

Swiatek leh Rybakina bakah hian Aryna Sabalenka te chu mipui hmuh châk an ni. World number 2 Sabalenka hi Belarus mi a ni a, hei tak hian British mipui ten engtiang takin nge an lo dawnsawn tih hriat a châkawm hle.

Ranking point

Russia leh Ukraine an indo a, khawvel ram tam zawkin Russia chu a thiam lo leh mawhphurtu zawkah an ngai - hei vang hian a thurualpuitu Belarus nen ei leh bar bakah infiamna thlengin an hrek.

Bristain chu Russia chet dan duh lotu langsar tak a ni a, hei hian tennis pawh a nghawng. Season hmasa khan Wimbledon-ah Russian leh Belarus player an tel an remti lo bur.

Mahse, tennis hi Britain duhdana kal ngawt tur erawh a ni bik lo. Mipa leh hmeichhe tennis thuneitu sang Association of Tennis Professionals (ATP) leh Women's Tennis Association (WTA) te chuan ranking point an pe duh bik lo.

Ranking point awm loin Wimbledon 2023 khelh a ni a, a awmziaah chuan Grand Slam champion ten ranking point 2000 ngawt an hmuh ṭhin kha a awm ve lo, hei hian a nomawi hlutna a tihniam lo a nih pawhin player kal zel dan a nghawng.

Nasa taka sawisel a ni a, tournament dang an khelh leh dawnah ranking point an neih tlem miau avangin seeding sang an chang thei lo, kuminah erawh Russia leh Belarus player an tel an phal ta - ranking point pawh a pangngai dawn.