Intluktlan duh Hamilton

Lewis Hamilton chuan Formula 1 dan leh hrai hman lai chu team ṭha leh chak tana ṭha bik lutuk tih a sawi a, team nem leh hnufual deuhte nen angkhat tlang an awm theihna tur dan awm se a duh thu a sawi.

Britain tlangval Hamilton sawi dan chuan, car nei ṭha sate chuan season thar atana an car neih tur ngaihtuh nan hun an ngah bik a, an car hman lai a ṭhat miau chuan a dang lo siam chhuak leh turin an dinhmun a ṭha sa bik lutuk niin a sawi.

Tun hnaiah Red Bull chuan car intlansiakna sang ber hi an thunun hneh hle a, team dang tan hmun an kian lo. Season kal laiah phei chuan Red Bull driver pahnih Max Verstappen leh Sergio Perez te chauhin hnehna an la chang thei hial.

Mercedes driver Hamilton chuan, "Tunah chuan kan intlansiak bul ṭanna hi a inang lo deuhah ka ngai, team ṭhenkhat chuan season thar atan an car tur an ngaihtuah leh char char thei tawh.

"Hetihlai hian team tam zawk chuan tun season chhunga an car hman tihchak leh thuam ṭhat dan tur an ngaihtuah char char a la ngai ve thung, kan dinhmun hi a inang lo hle a ni," a ti.

Red Bull hian kum 2021 khan sum hman theih zat bituk chu an hmang pel nia sawi a ni a, hei hi team ṭhenkhat chuan nasa takin an sawisel a, tun thlenga an dinhmun ṭhat theih chhana ngai pawh an awm.

Mahse, Hamilton hian kum 2014 aṭanga kum 2020 inkar khan Mercedes car khalh chungin tuna Red Bull dinhmun ṭha ang hi chu a lo tawng daih tawh a, vawi sarih a champion theih chhan langsar tak pawh a ni.

Kum 38 mi Hamilton chuan, "F1 hi season 17 chhung ka chamchilh tawh, tun hma pawhin team pakhatin hneh taka intlansiak an lo thunun hi kan hmu tawh ṭhin, kei ngei pawhin he hun hi ka lo tawng tawh.

"Team dangin an tawn hun a awm a, chutiang zelin midang pawhin an la tawng zel ang. Chutihrualin team tin hian kan hun neih a intluktlan theih dan hi ngaihtuah ni se a duhawm hle," a ti.

Hamilton hian F1 title hi vawi sarih a la tawh, champion hnem lamah German legend Michael Schumacher nen an intluk mek a, kal fal turin vawi khat champion a la mamawh.

Record ropui siam a tumna lamah Red Bull leh Verstappen an lo lang, kum 2021 khan intlansiak hnuhnung berah Max-a a hneh lo a, season hmasa phei kha chuan chak ni hmel a hmu ve tawh miah lo.

Tun season kal laiah Hamilton a la chak ve leh lo, nikum ang bawka chak ni hmel hmu lo thei dinhmunah a ding mek, a kum a tamin a hun ṭha a liam ve mek a, a team Mercedes leh mimal thawhleh theih dan tur nia a hriat a sawi hi a mak hran lo.

F1 hi kuminah intlansiak vawi riat an hmachhawn tawh, pakuana tur atan Pathianni zan dar 6:30 hian Red Bull Ring-ah Austrian Grand Prix an tlan leh ang.