Kante-a'n club a lei!

Saudi Arabia Pro League club Al-Ittihad a zawm hnuah N'Golo Kante-a'n chanchinthar a neih chhunzawm zel a, Belgian third division club Royal Excelsior Virton a lei.

Kum 32 mi Kante hian vawiin aṭangin club Chairman hna a chelh ṭan dawn a, Flavio Becca a thlak ang. Belgian club chuan thuchhuah siamin, "Flavio chu N'Golo Kante hnena he club a hlan chhawng thei hi a lawm takzet a ni," an ti.

Royal Excelsior Virton chuan, "Player class sang tak, khelmuala a theihna piahlama mihring ṭha tak a nihnain a chawisan êm êm a ni," an ti a, French midfielder-in an club a lei ta chu an hlim hle.

Kante hian Belgian club lei nan hian engzat chiah nge a sen tarlan a ni lo a, club chuan leiba engmah an neih loh thu sawiin, board of director thar pawh din thuai a nih tur thu an sawi.

Royal Excelsior Virton hian season tharah Belgian National Division 1 an khel dawn a, hei hi an ram league division kalphungah third division a ni.

Kane hian French amateur division lamah a career ṭanin, kum 2013 khan Caen a zawm a, hemi hnuah hi chuan a hawi kir leh tawh lo. Kum 2016 khan khawvel mak tih turin Leicester City chu Premier League-ah a champion pui a, Chelsea a zawm zui.

London club tan hian Champions League, Premier League, Europa League leh FA Cup-ah a champion pui a, World Cup 2018-a France an champion theih nan player pawimawh a ni bawk.

Kante hian a club thar Al-Ittihad-ah hian season khatah pound maktaduai 21.5 a hlawh dawn nia tarlan a ni a, Belgian third division club ṭha taka enkawlna tur khawp pawisa chu a nei!

Professional footballer-ten club neih an intihhmuh chhoh zel a, tun hnai khan Wilfried Zaha chuan rapper Stormzy nen non-league club AFC Croydon an lo inlei ṭawm tawh bawk.

Leicester-a Kante nena khel dun ṭhin Jamie Vardy chu US club Rochester New York FC neitu zingah a tel mek a, Barcelona defender chawl ta Gerard Pique chu segunda division club FC Andorra neitu a ni a, Sporting Lisbon wing back Hector Bellerin chu League One side Forest Green Rovers neitu zingah a tel a, Cesar Azpilicueta hian non-league club Hashtag United a nei bawk - la inkhel mek zingah anni lo pawh club nei an awm nual.

Player chawl tawh langsar zingah striker ropui Ronaldo chuan Brazilian Serie A club Cruzeiro leh Spanish La Liga club Real Valladolid a nei mek a, David Beckham chu Lionel Messi la luttu tur Inter Miami neitu zingah a tel bawk - footballer langsarten hian club neih an intihhmuh zel dawn niin a lang.