Club nei lo PL golden glove dawngtu De Gea

Nimin thleng khan David de Gea-a'n Manchester United-ah contract a ziak lo a, June thla tawp ruala Spanish keeper contract a zawh avangin Premier League golden glove dawngtu hian club a nei lo.

Nizan lama contract thar an ziak a nih ngawt loh chuan kum 32 mi De Gea hian a duh duh club a zawm thei tihna a ni. Chutihrualin 'free agent' ni mah se De Gea hi Man United-a a hlawh ang hlawh pe thei club an tam lo ang.

De Gea hian kum 2019-a contract a pawhsei khan kar khatah £375,000 a hlawh. Tun ṭumah hian Spanish keeper hian a hlawh hi ṭhahnem taka tihhniam a remti a, United lamin an la pawm lo.

Erik Ten Hag-a'n Ajax-a a enkawl tawh Inter Milan keeper Andre Onana lakluh a duh nia sawi a ni a, hei hi United-in De Gea contract an la ziahpui lo chhana ngaih a ni.

De Gea hi Spain tan a khel phak tawh lo a, Man United-a a hlawh ang emaw a aia tam emaw pe thei tur chu Saudi club an ni ang. Spanish keeper hi Cristiano Ronaldo khelhna Al Nassr nen an indawr nia sawi a awm bawk.

United hian De Gea thachhangdawltu Tom Heaton erawh kum khat atan a contract an pawhsei sak. Dean Henderson pawh loan-a a khelhna Nottingham Forest-a a inhliam hnuin Old Trafford-ah inenkawl turin a kir.